மளிகை கடை என்ற பெயரில் நடந்த கொடூரம்: தனிப்படை சோதனையில் அம்பலமான ரகசியம்!

<p style="text-align: justify;"><strong>மயிலாடுதுறை:&nbsp; </strong>மயிலாடுதுறை மற்றும் அதன் சுற்றுவட்டாரப் பகுதிகளில் அரசால் தடை செய்யப்பட்ட குட்கா, ஹான்ஸ் உள்ளிட்ட போதைப்பொருட்கள் விற்பனையைத் தடுத்து, இளைஞர்களைப் பாதுகாக்கும் பொருட்டு மாவட்ட காவல் கண்காணிப்பாளர் உத்தரவின்பேரில் தீவிர நடவடிக்கைகள் எடுக்கப்பட்டு வருகின்றன. இந்நிலையில், ரயிலடி கிட்டப்பா பாலம் அருகே தனிப்படை போலீசார் மேற்கொண்ட அதிரடி வாகன சோதனையின்போது,&nbsp; குட்கா கடத்தல் நபர் சிக்கியுள்ளார். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.</p> <h3 style="text-align: justify;">வாகன சோதனையில் சிக்கிய சாக்கு மூட்டைகள்</h3> <p style="text-align: justify;">மயிலாடுதுறை ரயிலடி கிட்டப்பா பாலம் பகுதியில் தனிப்படை சிறப்பு சப்-இன்ஸ்பெக்டர் ரமேஷ் தலைமையில், தலைமைக் காவலர்கள் மூர்த்தி, மனோகர், பிரபாகர் மற்றும் மதன் ஆகியோர் தீவிர வாகனத் தணிக்கையில் ஈடுபட்டிருந்தனர். அப்போது அந்த வழியாக சந்தேகத்திற்கு இடமான வகையில் மோட்டார் சைக்கிள் ஒன்றில் வந்த நபரை போலீசார் தடுத்து நிறுத்தினர். அவர் வைத்திருந்த சாக்கு முட்டைகளை சோதனை செய்தபோது, அதில் அரசால் முற்றிலும் தடை செய்யப்பட்ட ஹான்ஸ், குட்கா உள்ளிட்ட நச்சுத்தன்மை வாய்ந்த போதைப்பொருட்கள் இருப்பது கண்டுபிடிக்கப்பட்டது.</p> <p style="text-align: justify;">உடனடியாக உஷாரடைந்த தனிப்படை போலீசார், அந்த நபரை மடக்கிப் பிடித்து காவல் நிலையத்திற்கு அழைத்துச் சென்று தீவிர விசாரணை மேற்கொண்டனர்.</p> <h3 style="text-align: justify;">விசாரணையில் அம்பலமான திடுக்கிடும் உண்மைகள்</h3> <p style="text-align: justify;">போலீசாரின் தீவிர விசாரணையில், பிடிபட்ட நபர் புதுக்கோட்டை மாவட்டம் அம்மாபட்டினத்தைச் சேர்ந்த இப்ராகிம் (வயது 60) என்பது தெரியவந்தது. இவர் தற்போது கும்பகோணம் ஸ்ரீநகர் காலனியில் தங்கி, மளிகை பொருட்கள் மொத்த வியாபாரம் செய்வது போல் நடித்து, இந்தத் தடை செய்யப்பட்ட புகையிலை பொருட்களை ரகசியமாகப் பதுக்கி விற்று வந்துள்ளார். மேலும், மயிலாடுதுறை மற்றும் பல்வேறு மாவட்டங்களுக்கு கும்பகோணத்தில் இருந்து இவர்தான் போதைப்பொருட்களை சப்ளை செய்து வந்துள்ளார் என்பதும் விசாரணையில் தெரியவந்துள்ளது.</p> <h3 style="text-align: justify;">கும்பகோணத்தில் தனிப்படை அதிரடி ரெய்டு</h3> <p style="text-align: justify;">மயிலாடுதுறையில் சிக்கிய இப்ராகிமிடம் நடத்திய விசாரணையின் அடிப்படையில், மயிலாடுதுறை தனிப்படை போலீசார் உடனடியாக கும்பகோணத்திற்கு விரைந்தனர். அங்கு இப்ராகிம் நடத்தி வந்த ரகசியக் கிடங்கில் அதிரடி சோதனை நடத்தினர்.</p> <p style="text-align: justify;">அப்போது, கிடங்கின் மாடிப் பகுதியில் பொதுமக்களின் கண்களில் படாதவாறு பதுக்கி வைக்கப்பட்டிருந்த பிரம்மாண்டமான 750 கிலோ எடையுள்ள ஹான்ஸ் மற்றும் குட்கா பொருட்கள் கண்டுபிடிக்கப்பட்டு முழுவதும் கைப்பற்றப்பட்டன.</p> <h3 style="text-align: justify;">போலீஸ் நிலையத்தில் ஒப்படைப்பு மற்றும் கைது நடவடிக்கை</h3> <p style="text-align: justify;">கும்பகோணத்தில் பறிமுதல் செய்யப்பட்ட இத்தனை டன் அளவிலான குட்கா மற்றும் ஹான்ஸ் பொருட்கள் அனைத்தும் உடனடியாக வாகனங்கள் மூலம் மயிலாடுதுறை போலீஸ் நிலையத்திற்கு கொண்டு வரப்பட்டு, அங்கு ஒப்படைக்கப்பட்டன.</p> <p style="text-align: justify;">இதனைத் தொடர்ந்து, மயிலாடுதுறை காவல் நிலைய இன்ஸ்பெக்டர் சிவசெந்தில்குமார் மற்றும் போலீசார் வழக்குப்பதிவு செய்தனர். தடை செய்யப்பட்ட போதைப்பொருட்களை பதுக்கி வைத்து விநியோகம் செய்த முக்கிய குற்றவாளியான மொத்த வியாபாரி இப்ராகிமை போலீசார் அதிரடியாகக் கைது செய்தனர். கைது செய்யப்பட்ட இப்ராகிமை நீதிமன்றத்தில் ஆஜர்படுத்தி, நீதிபதி உத்தரவின்படி சிறையில் அடைத்தனர்.</p> <h3 style="text-align: justify;">இளைஞர்களைக் குறிவைக்கும் போதை பொருட்கள்</h3> <p style="text-align: justify;">மயிலாடுதுறையில் பள்ளி, கல்லூரி மாணவர்களைக் குறிவைத்து விற்கப்படும் இதுபோன்ற குட்கா மற்றும் ஹான்ஸ் போன்ற போதைப்பொருட்களின் நடமாட்டம் நாளுக்கு நாள் அதிகரித்து வருவது பெற்றோரிடையே பெரும் அதிர்ச்சியை ஏற்படுத்தியுள்ளது. மளிகை வியாபாரம் என்ற போர்வையில் சத்தமின்றி நடக்கும் இந்த சட்டவிரோத செயல்களை முற்றிலுமாக ஒழிக்க வேண்டும் என்றும், இதற்குப் பின்னால் இருக்கும் மற்ற நபர்களையும் கைது செய்ய வேண்டும் என்றும் சமூக ஆர்வலர்களும் பொதுமக்களும் கோரிக்கை விடுத்துள்ளனர்.</p> <p style="text-align: justify;">தனிப்படை போலீசார் துரிதமாகச் செயல்பட்டு 750 கிலோ குட்கா பொருட்களைப் பறிமுதல் செய்து, வியாபாரியைக் கைது செய்துள்ள இந்த அதிரடி நடவடிக்கை அப்பகுதி மக்களிடையே வரவேற்பைப் பெற்றுள்ளது. மாவட்டத்தின் பல்வேறு பகுதிகளிலும் இது போன்ற சோதனைகள் தொடர்ந்து தீவிரப்படுத்தப்படும் என்று காவல்துறை தரப்பில் எச்சரிக்கப்பட்டுள்ளது.</p>