<p style="text-align: justify;">தமிழகம் முழுவதும் அரசுப் பேருந்துகள் இயங்காத வழித்தடங்கள் மற்றும் முன்பு இயக்கப்பட்டு பின்னர் பல்வேறு காரணங்களால் கைவிடப்பட்ட வழித்தடங்கள் குறித்த முழுமையான விவரங்களைச் சேகரித்து அறிக்கை அனுப்புமாறு அதிகாரிகளுக்கு உத்தரவிடப்பட்டுள்ளது.</p>
<h3 style="text-align: justify;">மக்களின் கோரிக்கை மற்றும் தற்போதைய நிலை</h3>
<p style="text-align: justify;">தற்போது மாநிலம் முழுவதும் உள்ள அரசுப் போக்குவரத்துத் கழகங்கள் வாயிலாக 20,000-க்கும் மேற்பட்ட பேருந்துகள் இயக்கப்பட்டு வருகின்றன. இருப்பினும், கிராமப்புறப் பகுதிகளில் இன்னமும் அரசுப் பேருந்து வசதி முழுமையாகச் சென்றடையவில்லை என்ற குறைபாடு நிலவுகிறது. மேலும், சில வழித்தடங்களில் காலை, மாலை அல்லது இரவு நேரங்களில் ஒரே ஒரு சுற்று மட்டுமே பேருந்துகள் இயக்கப்படுவதாகவும், வார விடுமுறை நாட்களில் டவுன் பஸ் சேவை பெருமளவில் குறைக்கப்படுவதாகவும் பயணிகள் தொடர்ந்து புகார்களைத் தெரிவித்து வருகின்றனர்.</p>
<h3 style="text-align: justify;">புதிய பேருந்துகள் இயக்கம் மற்றும் ஆய்வு அறிக்கை</h3>
<p style="text-align: justify;">இப்பிரச்சனைகளுக்குத் தீர்வு காணும் வகையில், வரும் செப்டம்பர் மாதத் தொடக்கத்தில் புதிய பேருந்துகளை இயக்கும் திட்டத்தை அரசு செயல்படுத்த உள்ளது. இதன் ஒரு பகுதியாக, இதுவரை பேருந்து வசதியே இல்லாத பகுதிகள் மற்றும் சேவை நிறுத்தப்பட்ட வழித்தடங்களில் மீண்டும் பேருந்துகளை இயக்க அரசு முடிவு செய்துள்ளது. இதற்காகத் தேவைப்படும் விரிவான தகவல்களைப் போக்குவரத்து மண்டல / கோட்ட வாரியாகத் தயாரித்து உடனடியாக அனுப்புமாறு மேலாண்மை இயக்குநர்களுக்கு அறிவுறுத்தல்கள் வழங்கப்பட்டுள்ளன.</p>
<h3 style="text-align: justify;">சேகரிக்கப்படும் தகவல்கள்</h3>
<p style="text-align: justify;">இது குறித்துப் போக்குவரத்துக்கழக அதிகாரிகள் கூறுகையில், பேருந்து வசதி இல்லாத கிராமங்கள் மற்றும் வழித்தடங்கள் தொடர்பான விவரங்கள் வட்டாரப் போக்குவரத்துத் துறை மூலம் சேகரிக்கப்பட்டு, மாவட்ட ஆட்சியர்கள் வழியாக அரசுக்கு அனுப்பப்பட்டு வருகின்றன. இத்தகைய புதிய வழித்தடங்களில் பேருந்துகளை இயக்கத் தொடங்கினால் பொதுமக்களிடையே நல்ல வரவேற்பு கிடைக்கும் என்பதால், தமிழ்நாடு முழுவதும் தீவிரமாகத் தகவல்கள் திரட்டப்பட்டு வருவதாகத் தெரிவித்தனர்.</p>
2 months ago
4 
