தந்தை - மகன் மோதலில் பரபரப்பு 'கிளைமாக்ஸ்'! நீதிமன்ற மனு வாபஸ்: ராமதாஸ் எடுத்த திடீர் முடிவு!

<p>சென்னை: பாட்டாளி மக்கள் கட்சியின் (பா.ம.க.) தலைவராகத் தன்னை அறிவிக்கக் கோரி சென்னை உரிமையியல் நீதிமன்றத்தில் தாக்கல் செய்த மனுவை நிறுவனர் மருத்துவர் எஸ். ராமதாஸ் திடீரென வாபஸ் பெற்றுக்கொண்டார். இதன் மூலம் பா.ம.க. தலைவராக அன்புமணி ராமதாஸே தொடர்வது உறுதியாகி உள்ளது.</p> <h2>தலைமை மோதல்</h2> <p>பாட்டாளி மக்கள் கட்சியில் நிறுவனர் ராமதாஸுக்கும், அவரது மகனும் முன்னாள் மத்திய அமைச்சருமான அன்புமணி ராமதாஸுக்கும் இடையே கட்சித் தலைமை மற்றும் நிர்வாக முடிவுகள் தொடர்பாகக் கடந்த சில மாதங்களாகவே கடுமையான கருத்து வேறுபாடுகளும் மோதல் போக்கும் நிலவி வந்தன.</p> <p>கட்சியின் தலைவராகத் தன்னை அறிவிக்க வேண்டும் என்றும், பா.ம.க.வின் பெயர், கொடி மற்றும் 'மாம்பழம்' சின்னத்தை அன்புமணி ராமதாஸ் பயன்படுத்தத் தடை விதிக்க வேண்டும் என்றும் கோரி, ராமதாஸ் தரப்பில் சென்னை உரிமையியல் நீதிமன்றத்தில் வழக்கு தொடரப்பட்டிருந்தது.</p> <p>இந்த நிலையில் கடந்த சட்டமன்றத் தேர்தல் முடிந்த நிலையில் அன்புமணி தலைமையிலான பாமக நான்கு சட்டமன்ற உறுப்பினர்கள் வெற்றி பெற்று சட்டமன்றத்திற்கு சென்றனர். இதைத்தொடர்ந்து சமீபத்தில் மருத்துவர் ராமதாஸ் திருமண நாளில் அன்புமணி ராமதாஸ் தைலாபுரம் தோட்டத்திற்கு நேரில் சென்று தாய் தந்தையிடம் ஆசி பெற்றார். தந்தை மகனுக்கும் மோதல் நிலவி வந்த நிலையில் அத்தகைய சந்திப்பு மோதலுக்கு முற்றுப்புள்ளி வைத்து கட்சியை வலுப்படுத்த துவங்கியது.</p> <h2>நீதிமன்றத்தில் திடீர் திருப்பம்!</h2> <p>இந்த நிலையில், வழக்கு விசாரணைக்கு வந்தபோது ராமதாஸ் தரப்பில் ஆஜரான வழக்கறிஞர், "இந்த வழக்கை மேற்கொண்டு நடத்த விரும்பவில்லை. எனவே மனுவைத் திரும்பப் பெற அனுமதிக்க வேண்டும்" என்று கோரிக்கை வைத்தார்.</p> <p>இதனை ஏற்றுக்கொண்ட நீதிமன்றம், ராமதாஸ் தாக்கல் செய்த மனுவை வாபஸ் பெற அனுமதித்து வழக்கை முடித்து வைத்தது.</p> <h2>அன்புமணி தான் தலைவர்</h2> <p>ராமதாஸின் இந்தத் திடீர் முடிவின் மூலம், பா.ம.க.வில் நீடித்து வந்த சட்டப் போராட்டத்திற்கும் உட்கட்சிப் பூசல்களுக்கும் முற்றுப்புள்ளி வைக்கப்பட்டுள்ளது.</p> <p>இந்தியத் தேர்தல் ஆணையத்தின் அங்கீகாரத்தைத் தொடர்ந்து, நீதிமன்ற வழக்கையும் ராமதாஸ் வாபஸ் பெற்றுள்ளதால், அன்புமணி ராமதாஸே பா.ம.க.வின் அதிகாரப்பூர்வத் தலைவர் என்பது முற்றிலும் உறுதி செய்யப்பட்டுள்ளது.</p> <h2>பின்னணி காரணம் என்ன?</h2> <p>தேர்தல் களம் சூடுபிடித்து வரும் நிலையில், கட்சிக்குள்ளேயே நீடித்து வந்த தலைமைப் போட்டி தொண்டர்களிடையே பெரும் குழப்பத்தையும் சோர்வையும் ஏற்படுத்தி வந்தது.</p> <p>குடும்பத்தினர் மற்றும் கட்சியின் மூத்த நிர்வாகிகள் நடத்திய தொடர் சமரசப் பேச்சுவார்த்தையின் பலனாக, கட்சியின் எதிர்கால நலனைக் கருத்தில் கொண்டு ராமதாஸ் இந்த இணக்கமான முடிவை எடுத்திருப்பதாகக் கூறப்படுகிறது.</p> <p>பாட்டாளி மக்கள் கட்சியின் பொதுக்குழுக்கூட்டம் வரும் 29.07.2026 (புதன்கிழமை) காலை 11.00 மணிக்கு மாமல்லபுரத்தில் உள்ள கான்ஃப்ளுயன்ஸ் (Confluence) அரங்கத்தில் நடைபெற உள்ளது என்பது குறிப்பிடத்தக்கது.</p> <p>ராமதாஸின் இந்த அதிரடி முடிவைத் தொடர்ந்து, பா.ம.க. தொண்டர்களும் நிர்வாகிகளும் பெரும் நிம்மதியும் மகிழ்ச்சியும் அடைந்துள்ளனர்.</p>