தஞ்சையில் அதிரடி வேட்டை! ஒரே நாளில் 1 டன் தடை செய்யப்பட்ட பிளாஸ்டிக் பறிமுதல்

<p style="text-align: justify;">தஞ்சாவூர்: தஞ்சாவூர் மாநகராட்சி பகுதியில் அரசால் தடை செய்யப்பட்ட பிளாஸ்டிக் பொருட்கள் விற்பனை மற்றும் பயன்பாட்டைத் தடுக்க மாநகராட்சி அதிகாரிகள் மேற்கொண்ட அதிரடி சோதனையில் சுமார் 1 டன் பிளாஸ்டிக் பொருட்கள் பறிமுதல் செய்யப்பட்டன.</p> <p style="text-align: justify;">மேலும், தடை செய்யப்பட்ட பிளாஸ்டிக் பொருட்களை விற்பனை செய்த கடை மற்றும் குடோன் உரிமையாளர்களிடம் இருந்து ரூ.10 ஆயிரம் அபராதம் வசூலிக்கப்பட்டது. தஞ்சாவூர் மாநகராட்சி பகுதிகளில் அரசால் தடை செய்யப்பட்ட பிளாஸ்டிக் பொருட்கள் தொடர்ந்து விற்பனை செய்யப்படுவதாக மாநகராட்சி அதிகாரிகளுக்கு பல்வேறு புகார்கள் வந்தன. இதையடுத்து, மாநகராட்சி ஆணையாளர் வெ.தீபனா விஸ்வேஸ்வரி வழிகாட்டுதலின்பேரில், மாநகராட்சி அதிகாரிகள் தடை செய்யப்பட்ட பிளாஸ்டிக் பொருட்களுக்கு எதிராக தீவிர சோதனையை மேற்கொண்டனர்.</p> <p style="text-align: justify;"><br /><img src="https://feeds.abplive.com/onecms/images/uploaded-images/2026/08/22/8a7eae876f6285ce91b5de80435fd3351787391059613733_original.jpg" /></p> <p style="text-align: justify;">மாநகர்நல அலுவலர் டாக்டர் வீராசாமி மோகன்குமார் மேற்பார்வையில் நடைபெற்ற இந்த சோதனையில், தஞ்சாவூர் மாநகராட்சிக்குட்பட்ட கீழராஜவீதி, பழைய பஸ் நிலையம் உள்ளிட்ட முக்கிய வணிகப் பகுதிகளில் உள்ள கடைகள் மற்றும் குடோன்களில் அதிகாரிகள் தீவிர ஆய்வு நடத்தினர்.</p> <p style="text-align: justify;">இந்த ஆய்வின்போது, கடைகளில் விற்பனைக்காக பதுக்கி வைக்கப்பட்டிருந்த தடை செய்யப்பட்ட பாலித்தீன் பைகள், பிளாஸ்டிக் டப்புகள், பிளாஸ்டிக் டம்ளர்கள் உள்ளிட்ட பல்வேறு வகையான பிளாஸ்டிக் பொருட்கள் கண்டறியப்பட்டன. அவற்றை அதிகாரிகள் உடனடியாக பறிமுதல் செய்தனர்.</p> <p style="text-align: justify;">மாநகராட்சி துப்புரவு அலுவலர்கள், துப்புரவு ஆய்வாளர்கள், பணி மேற்பார்வையாளர்கள் மற்றும் மாநகராட்சி ஊழியர்கள் அடங்கிய குழுவினர் இந்த சோதனையில் ஈடுபட்டனர். கடைகளில் வைக்கப்பட்டிருந்த பொருட்களை ஆய்வு செய்ததுடன், தடை செய்யப்பட்ட பிளாஸ்டிக் பொருட்கள் விற்பனை செய்யப்படுகிறதா என்பது குறித்தும் அதிகாரிகள் கண்காணித்தனர்.</p> <p style="text-align: justify;">சோதனையின் முடிவில் சுமார் 1 டன் அளவிலான தடை செய்யப்பட்ட பிளாஸ்டிக் பொருட்கள் பறிமுதல் செய்யப்பட்டன. பறிமுதல் செய்யப்பட்ட பொருட்கள் அனைத்தும் மாநகராட்சி வாகனங்களில் பாதுகாப்பாக ஏற்றப்பட்டு, அரியலூரில் உள்ள டால்மியா சிமெண்ட் தொழிற்சாலைக்கு கொண்டு செல்லப்பட்டன. அங்கு அவை உரிய முறையில் அழிப்பதற்கான நடவடிக்கைகள் மேற்கொள்ளப்பட்டன.</p> <p style="text-align: justify;">தடை செய்யப்பட்ட பிளாஸ்டிக் பொருட்களை விற்பனை செய்த கடை மற்றும் குடோன் உரிமையாளர்களிடம் இருந்து மொத்தம் ரூ.10 ஆயிரம் அபராதமாக வசூலிக்கப்பட்டது. மாநகராட்சி அதிகாரிகளின் இந்த நடவடிக்கை வணிகர்கள் மத்தியில் பரபரப்பை ஏற்படுத்தியது.</p> <p style="text-align: justify;">பிளாஸ்டிக் பயன்பாட்டால் சுற்றுச்சூழலுக்கு ஏற்படும் பாதிப்புகளை கருத்தில் கொண்டு, தமிழக அரசு பல்வேறு வகையான ஒருமுறை பயன்படுத்தும் பிளாஸ்டிக் பொருட்களுக்கு தடை விதித்துள்ளது. இருப்பினும் சில பகுதிகளில் தடையை மீறி பிளாஸ்டிக் பொருட்கள் விற்பனை செய்யப்படுவதாக புகார்கள் தொடர்ந்து வருகின்றன. இதனைத் தடுக்கும் வகையில் மாநகராட்சி நிர்வாகம் தொடர் சோதனைகளை மேற்கொண்டு வருகிறது.</p> <p style="text-align: justify;">இதுகுறித்து மாநகராட்சி ஆணையாளர் வெ.தீபனா விஸ்வேஸ்வரி கூறுகையில், தஞ்சாவூர் மாநகராட்சிக்குட்பட்ட அனைத்து 51 வார்டுகளிலும் தடை செய்யப்பட்ட பிளாஸ்டிக் பொருட்களின் விற்பனை மற்றும் பயன்பாட்டை கண்காணிக்கும் வகையில் தொடர்ந்து அதிரடி சோதனைகள் நடத்தப்படும்.</p> <p style="text-align: justify;">தொடர்ந்து விதிமுறைகளை மீறி தடை செய்யப்பட்ட பிளாஸ்டிக் பொருட்களை பயன்படுத்தும் அல்லது விற்பனை செய்யும் கடைகள் மீது கடும் நடவடிக்கை எடுக்கப்படும். குறிப்பாக, சம்பந்தப்பட்ட கடைகளின் உரிமம் ரத்து செய்யப்படுவதுடன், தேவையான சூழலில் அந்தக் கடைகளுக்கு சீல் வைக்கப்படும் என்றும் மாநகராட்சி ஆணையாளர் கடுமையாக எச்சரித்துள்ளார்.</p> <p style="text-align: justify;">மேலும், சோதனையின்போது தடை செய்யப்பட்ட பிளாஸ்டிக் பொருட்கள் கண்டறியப்பட்டால் அபராதம் விதிப்பதுடன், அவற்றை பறிமுதல் செய்து உரிய முறையில் அழிக்க நடவடிக்கை எடுக்கப்படும் என்றும் அதிகாரிகள் தரப்பில் தெரிவித்துள்ளனர்.&nbsp;</p> <p style="text-align: justify;">தஞ்சாவூர் மாநகராட்சி பகுதியில் ஒரே சோதனையில் 1 டன் தடை செய்யப்பட்ட பிளாஸ்டிக் பொருட்கள் பறிமுதல் செய்யப்பட்டிருப்பது, மாநகராட்சி நிர்வாகத்தின் கண்காணிப்பு நடவடிக்கைகள் தீவிரமடைந்துள்ளதை வெளிப்படுத்துகிறது. வருங்காலங்களில் பொதுமக்கள் மற்றும் வணிகர்கள் தடை செய்யப்பட்ட பிளாஸ்டிக் பொருட்களை பயன்படுத்துவதை தவிர்த்து, சுற்றுச்சூழலுக்கு உகந்த மாற்றுப் பொருட்களை பயன்படுத்த வேண்டும் என மாநகராட்சி நிர்வாகம் வலியுறுத்தியுள்ளது. மாநகராட்சி அதிகாரிகளின் இந்த நடவடிக்கைக்கு ொதுமக்கள் மத்தியில் பாராட்டுக்கள் குவிந்து வருகிறது.</p>