<p style="text-align: justify;">தஞ்சாவூர்: தஞ்சாவூர் மாவட்டத்தில் நடைபெற்ற மக்கள் குறைதீர்க்கும் நாள் கூட்டத்தில், பொதுமக்களிடம் இருந்து ஒரே நாளில் 602 கோரிக்கை மனுக்கள் பெறப்பட்டன. இந்த மனுக்கள் மீது உடனடியாக உரிய நடவடிக்கை எடுக்க வேண்டும் என சம்பந்தப்பட்ட துறை அலுவலர்களுக்கு மாவட்ட கலெக்டர் ரேவதி உத்தரவிட்டார். மேலும், மாற்றுத்திறனாளிகள் உள்ளிட்ட பயனாளிகளுக்கு பல்வேறு நலத்திட்ட உதவிகளும் வழங்கப்பட்டன.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/08/25/8ad9a890d5c70158bf3f0d1d594090b91787630343292733_original.jpg" /></p>
<p style="text-align: justify;"><strong>குறைதீர் கூட்டத்தில் குவிந்த 602 மனுக்கள்</strong></p>
<p style="text-align: justify;">தஞ்சாவூர் மாவட்ட ஆட்சியர் அலுவலகக் கூட்டரங்கில் பொதுமக்கள் குறைதீர்க்கும் நாள் கூட்டம் நேற்று மாவட்ட கலெக்டர் ரேவதி தலைமையில் நடைபெற்றது. மாவட்டத்தின் பல்வேறு பகுதிகளில் இருந்து வந்த பொதுமக்கள், தங்களது தனிப்பட்ட மற்றும் குடும்பம் சார்ந்த கோரிக்கைகள், அரசு நலத்திட்ட உதவிகள், வருவாய்த்துறை தொடர்பான பிரச்சினைகள் உள்ளிட்ட பல்வேறு கோரிக்கைகள் அடங்கிய மனுக்களை கலெக்டரிடம் நேரடியாக வழங்கினர்.</p>
<p style="text-align: justify;">இந்த கூட்டத்தில் இலவச வீட்டுமனைப் பட்டா, முதியோர் உதவித்தொகை, குடும்ப அட்டை, பட்டா மாற்றம் உள்ளிட்ட பல்வேறு கோரிக்கைகள் தொடர்பாக மொத்தம் 602 மனுக்கள் பொதுமக்களால் அளிக்கப்பட்டன. மனுக்களை பெற்றுக்கொண்ட மாவட்ட கலெக்டர் ரேவதி, ஒவ்வொரு மனுவிலும் தெரிவிக்கப்பட்டுள்ள கோரிக்கைகளை சம்பந்தப்பட்ட துறைகளுக்கு அனுப்பி, உரிய விசாரணை மேற்கொண்டு நடவடிக்கை எடுக்க வேண்டும் என அதிகாரிகளுக்கு அறிவுறுத்தினார். மேலும், பொதுமக்களின் கோரிக்கைகளை காலதாமதமின்றி பரிசீலித்து தகுதியானவர்களுக்கு அரசின் நலத்திட்ட உதவிகள் கிடைப்பதை உறுதி செய்ய வேண்டும் என்றும் உத்தரவிட்டார்.</p>
<p style="text-align: justify;"><strong>25 பேருக்கு காதொலிக் கருவிகள்</strong></p>
<p style="text-align: justify;">மக்கள் குறைதீர்க்கும் நாள் கூட்டத்தின் ஒரு பகுதியாக மாற்றுத்திறனாளிகள் நலத்துறை சார்பில் நலத்திட்ட உதவிகளும் வழங்கப்பட்டன. இதன்படி, 25 பயனாளிகளுக்கு ரூ.87,500 மதிப்பிலான காதுக்குப் பின்புறம் அணியும் காதொலிக் கருவிகளை மாவட்ட கலெக்டர் ரேவதி வழங்கினார். உதவிகளை பெற்றுக்கொண்ட பயனாளிகள், தங்களது அன்றாட வாழ்க்கையில் இந்த கருவிகள் பெரிதும் உதவியாக இருக்கும் என தெரிவித்தனர்.</p>
<p style="text-align: justify;">அரசின் நலத்திட்டங்கள் தகுதியான பயனாளிகளை சென்றடைவதை உறுதி செய்யும் வகையில், மாற்றுத்திறனாளிகளின் தேவைகளை கண்டறிந்து அவர்களுக்கு உரிய உதவிகளை வழங்க நடவடிக்கை எடுக்கப்பட்டு வருவதாக அதிகாரிகள் தெரிவித்தனர்.</p>
<p style="text-align: justify;"><strong>சவுதி அரேபியாவில் உயிரிழந்த தொழிலாளியின் குடும்பத்துக்கு நிதி</strong></p>
<p style="text-align: justify;">தொடர்ந்து, பேராவூரணி வட்டம் கொன்றைக்காடு பகுதியைச் சேர்ந்த சுப்பிரமணியன் ராமலிங்கம் என்பவர் சவூதி அரேபியாவில் பணிபுரிந்தபோது உயிரிழந்தார். அவருக்கு சேர வேண்டிய சட்டப்படியான நிலுவைத்தொகையான ரூ.67,330 அவரது குடும்பத்தினருக்கு வழங்கப்பட்டது.</p>
<p style="text-align: justify;">இதற்கான காசோலையை மாவட்ட கலெக்டர் ரேவதி, உயிரிழந்த சுப்பிரமணியன் ராமலிங்கத்தின் மனைவி பொக்கிஷத்திடம் நேரடியாக வழங்கினார்.</p>
<p style="text-align: justify;">வெளிநாடுகளில் பணிபுரியும் தொழிலாளர்கள் உயிரிழக்கும் சந்தர்ப்பங்களில் அவர்களுக்கு சேர வேண்டிய சட்டப்படியான நிலுவைத்தொகை மற்றும் உரிய நலத்திட்ட உதவிகள் அவர்களது குடும்பத்தினருக்கு சென்றடைவதற்கான நடவடிக்கைகள் மேற்கொள்ளப்பட்டு வருகின்றன.</p>
<p style="text-align: justify;"><strong>அதிகாரிகளுக்கு கலெக்டர் அறிவுறுத்தல்</strong></p>
<p style="text-align: justify;">மக்கள் குறைதீர்க்கும் நாள் கூட்டம் என்பது பொதுமக்கள் தங்களது குறைகளை மாவட்ட நிர்வாகத்தின் கவனத்திற்கு நேரடியாக கொண்டு செல்லும் முக்கியமான வாய்ப்பாக உள்ளது. இதில் பெறப்படும் மனுக்கள் மீது துறைவாரியாக நடவடிக்கை மேற்கொண்டு, மனுதாரர்களின் கோரிக்கைகள் தொடர்பாக உரிய தீர்வு காணப்படுகிறதா என்பதை அதிகாரிகள் தொடர்ந்து கண்காணிக்க வேண்டும் என அறிவுறுத்தப்பட்டது.</p>
<p style="text-align: justify;">கூட்டத்தில் மாவட்ட வருவாய் அலுவலர் இளங்கோவன், சமூக பாதுகாப்புத் திட்ட தனித் துணை ஆட்சியர் சௌமியா மற்றும் அனைத்துத்துறை அலுவலர்கள் கலந்து கொண்டனர்.</p>
2 months ago
4 
