<p>தமிழகத்தில் விவசாயத் தொழிலை மேம்படுத்தவும், வேலைவாய்ப்பற்ற பட்டதாரி இளைஞர்களைச் சொந்தக் காலில் நிற்க வைத்து தொழில்முனைவோராக மாற்றவும் தமிழக அரசின் வேளாண்மை மற்றும் உணவுப் பதப்படுத்துதல் துறை புதிய அதிரடித் திட்டங்களைச் செயல்படுத்தி வருகிறது.</p>
<p>இதன் மூலம் புதிய வேளாண் சார்ந்த தொழில்களைத் தொடங்க விரும்புபவர்களுக்கு ₹10 லட்சம் வரை மானியம் வழங்கப்பட்டு வருகிறது.</p>
<h2>2 முக்கிய திட்டங்கள்</h2>
<p>மத்திய அரசின் 'பிரதமரின் உணவு பதப்படுத்தும் குறு நிறுவனங்களை முறைப்படுத்தும் திட்டம் (PMFME)' மற்றும் மாநில அரசின் 'வேளாண் தொழில் முனைவோருக்கான திட்டம்' ஆகிய 2 முக்கிய திட்டங்கள் மூலம் இந்த நிதியுதவிகள் தாராளமாக வழங்கப்படுகின்றன. கிராமப்புறங்களில் புதிய வேலைவாய்ப்புகளை உருவாக்குவதும், விளைபொருட்களை மதிப்பு கூட்டி விவசாயிகளின் வருமானத்தை உயர்த்துவதுமே இத்திட்டத்தின் முக்கிய நோக்கமாகும்.</p>
<h2>என்னென்ன தொழில்கள் செய்யலாம்?</h2>
<p>இந்த மானிய உதவியைப் பெற்று இளைஞர்கள் பின்வரும் தொழில்களைத் தொடங்கலாம்:</p>
<p>உணவுப் பதப்படுத்துதல் மற்றும் பேக்கிங் செய்தல்.</p>
<p>சிறு தானிய உணவுப் பொருட்கள் உற்பத்தி.</p>
<p>பாரம்பரிய செக்கு எண்ணெய் பிழிதல்.</p>
<p>ஊறுகாய், தொக்கு மற்றும் ஜாம் தயாரித்தல்.</p>
<p>பால் பண்ணை மற்றும் பால் உபபொருட்கள் தயாரிப்பு.</p>
<h2>பட்டதாரிகளுக்கு அள்ளிக்கொடுக்கும் சிறப்புச் சலுகை!</h2>
<p>புதிய தொழில் தொடங்க நினைப்பவர்கள் மட்டுமின்றி, ஏற்கனவே தொழிலை நடத்தி அதனை விரிவுபடுத்த நினைப்பவர்களும் இதற்கு விண்ணப்பிக்கலாம்.</p>
<p>குறிப்பாக, 21 முதல் 40 வயதுக்குட்பட்ட வேளாண்மை, தோட்டக்கலை அல்லது வேளாண் பொறியியல் துறையில் இளங்கலை பட்டம் பெற்ற இளைஞர்களுக்கு அரசு பம்பர் சலுகையை அறிவித்துள்ளது! இவர்களுக்குச் சுயதொழில் தொடங்க ஊக்கத்தொகையாக ₹1 லட்சம் வரை பின்னேற்பு மூலதன மானியம் தனியாக வழங்கப்படுகிறது.</p>
<h2>மானியம் எவ்வளவு தெரியுமா?</h2>
<p>வங்கி கடன் மூலம் தொழில் தொடங்க விரும்பும் இளைஞர்களுக்கு இந்த மானியம் ஒரு மிகப்பெரிய வரப்பிரசாதமாகும்.</p>
<p>புதிய தொழில்களுக்கு: திட்ட மதிப்பீட்டில் 35% வரை, அதாவது அதிகபட்சமாக ₹10 லட்சம் வரை அள்ளிக் கொடுக்கப்படும்.</p>
<p>தொழில் விரிவாக்கத்திற்கு: ஏற்கனவே உள்ள தொழிலை நவீனப்படுத்த அல்லது பெரிய அளவில் விரிவுபடுத்த ₹5 லட்சம் வரை மானியம் பெறலாம்.</p>
<h2>விண்ணப்பிப்பது எப்படி?</h2>
<p>இத்திட்டத்தின் கீழ் பயன்பெற விரும்புபவர்கள், தங்கள் பகுதியில் உள்ள வட்டார வேளாண்மை உதவி இயக்குனர் அலுவலகங்களை நேரில் அணுகி விண்ணப்பங்களைப் பெற்றுக் கொள்ளலாம்.</p>
<p>மேலும், ஸ்மார்ட்போன் வைத்துள்ளவர்கள் 'உழவன் செயலி' (Uzhavan App) மூலமாகவோ அல்லது www.tnagrisnet.tn.gov.in என்ற அரசின் அதிகாரப்பூர்வ இணையதளம் வழியாகவோ ஆன்லைனிலேயே மிக எளிதாக விண்ணப்பிக்கலாம்.</p>
<h2>தேவையான ஆவணங்கள்:</h2>
<p>விண்ணப்பிக்கும் போது தங்களது கல்விச் சான்றிதழ்கள், ஆதார் அட்டை நகல் மற்றும் வங்கி கணக்கு புத்தகத்தின் முதல் பக்க நகல் ஆகிய முக்கிய ஆவணங்களைச் சமர்ப்பிக்க வேண்டும்.</p>
<p>வேளாண் தொழிலில் சாதிக்கத் துடிக்கும் தமிழக இளைஞர்கள் மற்றும் விவசாயிகள் இந்த அரிய வாய்ப்பைப் பயன்படுத்தி, மாநிலத்தின் பொருளாதார வளர்ச்சிக்குப் பங்களிக்க வேண்டும் என வேளாண் துறை கேட்டுக்கொண்டுள்ளது.</p>
3 months ago
8 
