<p>தமிழ்நாட்டில் ‘திமுக 2.0 வெர்ஸன்’ ஆட்சியைத் தான் தவெக நடத்திக் கொண்டிருக்கிறது. மக்களின்‌ பல்வேறு பிரச்சினைகளை தீர்க்காமல், ஸ்டேடியம் கட்டுவதில் ஆதவ் அர்ஜூனா ஆர்வம் காட்டுகிறார் என லட்சிய ஜனநாயக கட்சி தலைவர் ஜோஸ் சார்லஸ் மார்டின் கூறியுள்ளார்.</p>
<p>தருமபுரியில் லட்சிய ஜனநாயகக் கட்சி சார்பில் அரசு மருத்துவக் கல்லூரி மருத்துவமனையில் சிறப்பு ரத்த தான முகாம், தூய்மைப் பணியாளர்களுக்கு நலத்திட்டங்கள் வழங்கும் நிகழ்ச்சி, கட்சி அலுவலகத்தில் கொடியேற்றும் நிகழ்ச்சி நடைபெற்றது. இந்நிகழ்ச்சிகளில் அக்கட்சியின் தலைவரும், புதுச்சேரி மாநில எம்எல்ஏ-வுமான ஜோஸ் சார்லஸ் மார்ட்டின் கலந்து கொண்டு நலத்திட்ட உதவிகளை வழங்கினார். </p>
<p> </p>
<p><iframe title="YouTube video player" src="https://www.youtube.com/embed/pOnnt7_vzs4?si=0nFR3zTUBZwbupTX" width="560" height="315" frameborder="0" allowfullscreen="allowfullscreen"></iframe></p>
<h2>தேர்தலில் தனித்துப்போட்டி</h2>
<p>இதனை தொடர்ந்து செய்தியாளர்களை சந்தித்த எம்எல்ஏ ஜோஸ் சார்லஸ் மார்டின் பேசியதாவது, “லட்சிய ஜனநாயகக் கட்சிக்கு பொறுப்பாளர் நியமனம் தீவிரமாக மேற்கொண்டு வருகிறோம். இதுவரை 11 லட்சம் உறுப்பினர்கள் கட்சியில் இணைந்துள்ளனர். வருகிற 2031 தமிழக சட்டப் பேரவை தேர்தலை எதிர்நோக்கியே கட்சியை பலப்படுத்தி வருகிறோம். அதேநேரம், தமிழகத்தில் வரவிருக்கும் உள்ளாட்சி தேர்தலில் எங்கள் கட்சி தனித்து போட்டியிடும். தமிழகத்தில் நடைபெறும் இடைத் தேர்தலுக்கு நாங்கள் யாருக்கும் ஆதரவு அளிக்கவில்லை. இந்த இடைத்தேர்தலே தவறானது. மக்கள் வரிப்பணத்தில் தொகுதிக்கு ரூ.10 கோடிக்கு மேல் செலவு செய்து தேர்வு செய்யப்பட்ட எம்எல்ஏ தனது சுய நலத்துக்காக ராஜினாமா செய்து வேறு கட்சியில் இணைவதும், அவர்களுக்காக மீண்டும் தேர்தல் நடத்துவதும் தவறு. இதனால், பல்வேறு தரப்பினரும் பாதிப்படைவர். எனவே, இடைத்தேர்தல் தேவைப்படும் தொகுதிகளில் மக்களால் ஏற்கெனவே 2-ம் இடம் அளிக்கப்பட்டவர்களைத் தான் இப்போது எம்எல்ஏ ஆக்க வேண்டும். இல்லையெனில், ராஜினாமா செய்தவர்களிடம் இடைத் தேர்தலுக்கான மொத்த செலவையும் வசூலித்து அதன்மூலம் தேர்தலை நடத்தலாம்.</p>
<h2> ‘திமுக 2.0 வெர்ஸன்’ </h2>
<p>தவெக ஆட்சி 116 நாளை கடந்துள்ளது. இந்நிலையில், சட்டம்-ஒழுங்கு மிக மோசமாக உள்ளது. குறுகிய நாட்களில் 500-க்கும் மேற்பட்ட தீவிர பிரச்சினைகள் தமிழகத்தில் நடந்துள்ளது. அதில், 200 கொலைகள், 200 மகளிர் மற்றும் குழந்தைகளுக்கு எதிரான பாலியல் சம்பவங்கள், 8 காவல் நிலைய உயிரிழப்புகள் ஆகியவை அடங்கும். இதையெல்லாம் ஒழிப்போம் எனக் கூறி, ஆட்சிக்கு வந்த <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a> இன்று ‘திமுக 2.0 வெர்ஸன்’ ஆட்சியைத் தான் நடத்திக் கொண்டிருக்கிறது. சட்டம்-ஒழுங்கை பராமரிக்க வெளிநாட்டு முதலீடு தேவையில்லை. நிர்வாகத்தை முறையாக மேற்கொண்டாலே போதுமானது. ஆனால், இவர்கள் வெளிநாடு பயணங்களில் தான் தீவிரம் காட்டுகின்றனர். லண்டன் போய் தமிழ் நாட்டில் உள்ள கம்பெனி முதலீடுகள் ஈர்த்துள்ளனர். தமிழக நிறுவனங்களையும், முதலமைச்சரையும் லண்டன் அழைத்துச் சென்று அதை தமிழகத்துக்கான வெளிநாட்டு முதலீடுகள் என அமைச்சர் ஆதவ் அர்ஜுனா காட்ட முயற்சிக்கிறார்.</p>
<p>அமைச்சருக்கு ஸ்டேடியம் கட்டுவதில்தான் ஆர்வம்</p>
<p>மார்க்சிஸ்ட் கம்யூனிஸ்ட் கட்சி மீது அமைச்சர் ஆதவ் அர்ஜுனா தற்போது குறைகளை கூறி வருகிறார். இன்றைய கூட்டணி ஒரு சந்தர்ப்பவாத கூட்டணி. தமிழக மக்களுக்கு குடிநீர் பிரச்சினை உட்பட பல தீவிர பிரச்சினைகள் இருக்கும்போது அதற்கு தீர்வு ஏற்படுத்தாமல், விளையாட்டரங்கம் கட்டுவதில்தான் அமைச்சர் ஆர்வம் காட்டி வருகிறார். திமுக என்றுமே வன்முறையை தூண்டுவதற்கு நேரம் பார்த்துக் கொண்டிருக்கும். அதேநேரம் தமிழகத்தில் இன்று பிரச்சினைகள் இருப்பதால் தான், அதை சுட்டிக்காட்ட வேண்டிய சூழல் ஏற்படுகிறது. பள்ளிகள் அளவிலும் சாதிப் பிரச்சினைகள் பரவும் அளவுக்கு சட்டம்-ஒழுங்கு கெட்டுள்ளது. இதையெல்லாம் முன்கூட்டியே தடுக்க வேண்டும். வேங்கை வயல் விவகாரத்தின்போது <a title="ஆதவ் அர்ஜுனா" href="https://tamil.abplive.com/topic/aadhav-arjuna" data-type="interlinkingkeywords">ஆதவ் அர்ஜுனா</a> தீவிரமாக போராடினார். ஆனால், அவர்கள் ஆட்சிக்கு வந்து 3 மாதம் முடிந்தும் அந்த சம்பவம் தொடர்பாக ஒரு நடவடிக்கையும் இல்லை. மின்சாரம் மிக அவசியமான ஒன்று என்பதால், தமிழகத்தில் மின்வெட்டு சரிசெய்யப்பட வேண்டும்” எனத் தெரிவித்தார்.</p>
<p><iframe class="vidfyVideo" style="border: 0px;" src="https://tamil.abplive.com/web-stories/lifestyle/how-to-remove-stains-from-stainless-steel-utensils-275261" width="631" height="381" scrolling="no"></iframe></p>
1 month ago
2 
