புதுச்சேரியில் வாகனங்களுக்கு ‘VIP’ நம்பர் வாங்க சூப்பர் வாய்ப்பு! செப்.1-ல் ஆன்லைன் ஏலம்!

<p>புதுச்சேரி: புதுச்சேரி போக்குவரத்துத் துறையின் PY-01 DH (புதுச்சேரி) வரிசையில் உள்ள ஃபேன்ஸி வாகன பதிவு எண்கள், ஆன்லைன் மூலம் ஏலம் விடப்பட உள்ளன. இந்த ஏலம் வரும் செப்டம்பர் 1-ம் தேதி காலை 11 மணி முதல் மாலை 4.30 மணி வரை நடைபெற உள்ளது.</p> <h2>ஆன்லைனில் பதிவு செய்யலாம்</h2> <p>ஏலத்தில் பங்கேற்க விரும்பும் பொதுமக்கள், ஆகஸ்ட் 26 முதல் 31-ம் தேதி வரை https://parivahan.gov.in/fancy இணையதளம் சென்று &ldquo;New Public User&rdquo; என்ற வசதியின் மூலம் தங்களது பெயர் மற்றும் கடவுச்சொல்லை பதிவு செய்து கொள்ள வேண்டும்.</p> <p>பதிவு செய்த பின்னர், தங்களுக்கு விருப்பமான ஃபேன்ஸி பதிவு எண்ணை தேர்வு செய்து, அந்த எண்ணுக்கான அடிப்படை தொகையை ஆன்லைன் மூலம் செலுத்த வேண்டும். அடிப்படை தொகையை செலுத்தியவர்கள் மட்டுமே செப்டம்பர் 1-ம் தேதி நடைபெறும் மின்னணு ஏலத்தில் பங்கேற்க அனுமதிக்கப்படுவார்கள்.</p> <h2>ஏல நிபந்தனைகள்</h2> <p>E-Auction முறையில் பங்கேற்க விரும்பும் பொதுமக்கள், ஏலத்திற்கான வழிமுறைகள், விதிமுறைகள் மற்றும் நிபந்தனைகளை ஆகஸ்ட் 26-ம் தேதி முதல் புதுச்சேரி போக்குவரத்துத் துறையின் அதிகாரப்பூர்வ இணையதளம் மூலம் தெரிந்து கொள்ளலாம். அதே இணையதளத்தில் தேவையான ஆவணங்கள் மற்றும் விவரங்களை பதிவிறக்கம் செய்துகொள்ளும் வசதியும் உள்ளது.</p> <p>ஏலத்தில் பங்கேற்பதற்கான விண்ணப்பத் தொகை, EMD எனப்படும் முன்பணத் தொகை, ஏல நிபந்தனைகள் மற்றும் இதர விவரங்கள் குறித்த தகவல்களையும் பொதுமக்கள் இணையதளம் மூலம் அறிந்து கொள்ளலாம்.</p> <p>மேலும், ஏலம் தொடர்பான சந்தேகங்கள் மற்றும் கூடுதல் தகவல்களுக்கு புதுச்சேரி போக்குவரத்துத் துறை அலுவலகத்தை 0413-2280170, Extn. 236 என்ற தொலைபேசி எண்ணில் தொடர்பு கொள்ளலாம்.</p> <h2>90 நாட்களுக்குள் வாகனம் பதிவு அவசியம்</h2> <p>ஏலத்தில் குறிப்பிட்ட ஃபேன்ஸி பதிவு எண்ணை பெற்றவர்கள், அந்த எண்ணை முன்பதிவு செய்த நாளிலிருந்து 90 நாட்களுக்குள் சம்பந்தப்பட்ட வாகனத்தை பதிவு செய்ய வேண்டும்.</p> <p>90 நாட்களுக்குள் வாகனம் பதிவு செய்யத் தவறினால், அந்த எண்ணுக்கான முன்பதிவு செயலிழந்ததாகக் கருதப்படும். இதனால் ஒதுக்கப்பட்ட பதிவு எண்ணின் மீதான உரிமையையும் சம்பந்தப்பட்ட நபர் இழக்க நேரிடும் என போக்குவரத்துத் துறை தெரிவித்துள்ளது.</p> <h2>ஆன்லைன் பணப்பரிவர்த்தனை மட்டுமே</h2> <p>இந்த E-Auction தொடர்பான அனைத்து பணப் பரிவர்த்தனைகளும் https://parivahan.gov.in/fancy இணையதளம் வாயிலாக ஆன்லைன் பேமெண்ட் முறையில் மட்டுமே மேற்கொள்ளப்படும். நேரடியாக அலுவலகத்தில் பணம் செலுத்துவதற்கோ அல்லது காசோலை மூலம் பணம் செலுத்துவதற்கோ அனுமதி இல்லை.</p> <p>எனவே, புதுச்சேரியில் விருப்பமான ஃபேன்ஸி வாகன பதிவு எண்ணை பெற விரும்பும் பொதுமக்கள், குறிப்பிட்ட காலக்கெடுவுக்குள் இணையதளத்தில் பதிவு செய்து, தேவையான அடிப்படை தொகையை செலுத்தி ஏலத்தில் பங்கேற்குமாறு கேட்டுக்கொள்ளப்பட்டுள்ளனர்.</p>