பாம்பு கடித்தால் பதற வேண்டாம்... உரிய சிகிச்சை பெற்றால் உயிரிழப்பை தவிர்க்கலாம்!

<p style="text-align: justify;">தஞ்சாவூர்: பாம்பு கடியால் பாதிக்கப்பட்டவர்கள் காலதாமதம் செய்யாமல் உடனடியாக மருத்துவமனைக்கு சென்று, மருத்துவர்களின் ஆலோசனைப்படி உரிய சிகிச்சை பெற்றால் உயிரிழப்பை பெருமளவு தவிர்க்க முடியும் என்று தஞ்சை மருத்துவக்கல்லூரி முதல்வர் மணிமேகலா தெரிவித்துள்ளார்.</p> <p style="text-align: justify;"><strong>உலக பாம்பு கடி தடுப்பு தினம்</strong></p> <p style="text-align: justify;">உலக பாம்பு கடி தடுப்பு தினம் ஆண்டுதோறும் செப்டம்பர் 19-ம் தேதி கடைபிடிக்கப்படுகிறது. பாம்பு கடியால் ஏற்படும் உயிரிழப்புகளை தடுப்பது, பொதுமக்களிடையே விழிப்புணர்வை ஏற்படுத்துவது, பாம்பு கடித்தவர்களுக்கு உடனடியாக மருத்துவ சிகிச்சை கிடைப்பதை உறுதி செய்வது ஆகியவற்றை வலியுறுத்தும் வகையில் பல்வேறு விழிப்புணர்வு நிகழ்ச்சிகள் நடத்தப்படுகின்றன.</p> <p style="text-align: justify;">இதையொட்டி தமிழக அரசு, தேசிய மருத்துவக் குழுமம் மற்றும் மருத்துவக் கல்வித்துறை சார்பில், தஞ்சை மருத்துவக்கல்லூரி பொது மருத்துவம் மற்றும் அவசர சிகிச்சை பிரிவு இணைந்து பல்வேறு விழிப்புணர்வு நிகழ்ச்சிகளை நடத்தின.</p> <p style="text-align: justify;"><strong>விழிப்புணர்வு ஊர்வலம்</strong></p> <p style="text-align: justify;">தஞ்சை மருத்துவக்கல்லூரி மருத்துவமனை வளாகத்தில் நடைபெற்ற விழிப்புணர்வு ஊர்வலத்தை மருத்துவக்கல்லூரி முதல்வர் மணிமேகலா தலைமை தாங்கி தொடங்கி வைத்தார். மருத்துவக் கண்காணிப்பாளர் ராமசாமி, துணை முதல்வர் ஆறுமுகம், மருத்துவத்துறை பேராசிரியர் கண்ணன், அவசர சிகிச்சைத்துறை தலைவர் டாக்டர் வினோத், நிலைய மருத்துவ அலுவலர் செல்வம், துணை நிலைய மருத்துவ அலுவலர்கள் முகமது கிரியாஸ், முத்துமகேஷ் உள்ளிட்டோர் முன்னிலை வகித்தனர்.</p> <p style="text-align: justify;">மருத்துவக் கல்லூரி மாணவ-மாணவிகள், செவிலியர்கள் மற்றும் மருத்துவப் பணியாளர்கள் ஏராளமானோர் ஊர்வலத்தில் கலந்து கொண்டனர். பாம்பு கடியைத் தடுப்பது, பாம்பு கடித்தால் மேற்கொள்ள வேண்டிய முதலுதவி நடவடிக்கைகள், மருத்துவமனைக்கு விரைந்து செல்வதன் அவசியம் உள்ளிட்டவை தொடர்பாக விழிப்புணர்வு ஏற்படுத்தப்பட்டது.</p> <p style="text-align: justify;"><strong>மாணவர்களுக்கு வினாடி-வினா</strong></p> <p style="text-align: justify;">ஊர்வலத்தைத் தொடர்ந்து மருத்துவக் கல்லூரி மாணவ-மாணவிகளுக்கு பாம்பு கடி தொடர்பான வினாடி-வினா போட்டி நடத்தப்பட்டது. இதில் பாம்புகளின் வகைகள், அவற்றின் விஷத்தின் தாக்கம், பாம்பு கடிக்கு வழங்கப்படும் சிகிச்சைகள், அவசர கால நடவடிக்கைகள் உள்ளிட்ட பல்வேறு தலைப்புகளில் கேள்விகள் இடம்பெற்றன.</p> <p style="text-align: justify;">இதையடுத்து பாம்பு கடியால் பாதிக்கப்பட்டவர்களுக்கு வழங்கப்படும் சிகிச்சை முறைகள் மற்றும் பாம்பு கடியில் இருந்து பொதுமக்கள் தங்களை எவ்வாறு பாதுகாத்துக் கொள்வது என்பது குறித்து சிறப்பு கருத்தரங்கம் நடைபெற்றது.</p> <p style="text-align: justify;"><strong>980 பேர் பாம்பு கடிக்கு சிகிச்சை</strong></p> <p style="text-align: justify;">கருத்தரங்கை தொடங்கி வைத்து தஞ்சை மருத்துவக்கல்லூரி முதல்வர் மணிமேகலா பேசியதாவது: தஞ்சை மருத்துவக்கல்லூரி மருத்துவமனைக்கு பாம்பு கடியால் பாதிக்கப்பட்டு சிகிச்சைக்காக வரும் நோயாளிகளின் எண்ணிக்கை குறிப்பிடத்தக்க அளவில் உள்ளது. கடந்த ஆண்டு மட்டும் 980 பேர் பாம்பு கடியால் பாதிக்கப்பட்டு மருத்துவமனையில் அனுமதிக்கப்பட்டு சிகிச்சை பெற்றுள்ளனர்.</p> <p style="text-align: justify;">நடப்பு ஆண்டில் இதுவரை 600 பேர் பாம்பு கடியால் பாதிக்கப்பட்டு சிகிச்சை பெற்றுள்ளனர். மழைக்காலம் மற்றும் விவசாயப் பணிகள் நடைபெறும் காலங்களில் பாம்பு கடி சம்பவங்கள் அதிகரிக்க வாய்ப்புள்ளதால் பொதுமக்கள் கூடுதல் எச்சரிக்கையுடன் இருக்க வேண்டும்.</p> <p style="text-align: justify;"><strong>உயிரிழப்பு விகிதம் குறைந்துள்ளது</strong></p> <p style="text-align: justify;">கடந்த ஆண்டு பாம்பு கடியால் பாதிக்கப்பட்டவர்களில் சுமார் 2.5 சதவீதம் பேர் உயிரிழந்துள்ளனர். இந்த ஆண்டு இதுவரை உயிரிழப்பு விகிதம் 2 சதவீதமாக குறைந்துள்ளது. மேலும் உயிரிழப்புகளைத் தவிர்ப்பதற்கு பாம்பு கடித்தவுடன் தாமதிக்காமல் மருத்துவமனைக்கு கொண்டு வருவது மிகவும் முக்கியம்.</p> <p style="text-align: justify;">பாம்பு கடித்தவர்களுக்கு வீட்டிலேயே பாரம்பரிய முறையில் சிகிச்சை அளிப்பது, காயத்தை அறுத்து ரத்தத்தை வெளியேற்ற முயற்சிப்பது போன்ற நடவடிக்கைகளை மேற்கொள்ளாமல், உடனடியாக மருத்துவமனைக்கு அழைத்துச் செல்ல வேண்டும். மருத்துவர்களின் ஆலோசனைப்படி உரிய சிகிச்சை கிடைத்தால் உயிரிழப்பு விகிதத்தை மேலும் குறைக்க முடியும். இவ்வாறு அவர் கூறினார்.</p> <p style="text-align: justify;"><strong>உடனடி சிகிச்சையே முக்கியம்</strong></p> <p style="text-align: justify;">பாம்பு கடித்ததாக சந்தேகம் ஏற்பட்டாலும், நேரத்தை வீணாக்காமல் அருகில் உள்ள அரசு மருத்துவமனை அல்லது உரிய மருத்துவ வசதி உள்ள மருத்துவமனைக்கு செல்ல வேண்டும். குறிப்பாக விஷப்பாம்பு கடித்தால் விஷத்தின் தாக்கம் வேகமாக அதிகரிக்கக்கூடும் என்பதால் ஆரம்ப கட்டத்திலேயே மருத்துவ சிகிச்சை பெறுவது உயிரைக் காப்பாற்றுவதில் முக்கிய பங்கு வகிக்கிறது.</p> <p style="text-align: justify;">பாம்பு கடித்தவரை பதற்றப்படுத்தாமல் அமைதியாக வைத்திருப்பதும், தேவையற்ற அசைவுகளை குறைப்பதும் முக்கியம். பாம்பை பிடிக்கவோ, கொல்ல முயற்சிக்கவோ கூடாது. பாம்பின் தோற்றத்தை நினைவில் வைத்திருந்தால் அதை மருத்துவர்களிடம் தெரிவிக்கலாம்.</p> <p style="text-align: justify;">கருத்தரங்கில் டாக்டர்கள் மணிமாறன், தினேஷ், கண்ணன் மற்றும் பேராசிரியர்கள், மருத்துவக் கல்லூரி மாணவ-மாணவிகள், செவிலியர்கள் உள்ளிட்ட பலர் கலந்து கொண்டனர்.</p>