பாகுபாட்டை வெல்ல இளைஞர்களின் ஓட்டம்: காரைக்கால் ஜிப்மரின் அசத்தல் விழிப்புணர்வு முயற்சி!

<p style="text-align: justify;">ஜிப்மர் காரைக்காலில் எச்.ஐ.வி. மற்றும் பால்வினைத் தொற்று குறித்த விழிப்புணர்வு ஓட்டம் 'ரெட் ரன் 2026' என்ற தலைப்பில் 5 கி.மீ தூரம் மராத்தான் நடைபெற்றது&zwnj;.</p> <p style="text-align: justify;"><strong>காரைக்கால்: </strong>காரைக்கால் ஜிப்மர் மருத்துவக்கல்லூரி சார்பில் எச்.ஐ.வி. மற்றும் பால்வினைத் தொற்று குறித்து பொதுமக்கள் மற்றும் இளைஞர்களிடையே விரிவான விழிப்புணர்வை ஏற்படுத்தும் வகையில், 5 கிலோமீட்டர் தூர 'ரெட் ரன் 2026' விழிப்புணர்வு ஓட்டப் பந்தயம் மற்றும் விழிப்புணர்வு நாடக நிகழ்வு மிகச் சிறப்பாக நடைபெற்றது.&nbsp;</p> <p style="text-align: justify;">ஜிப்மர் காரைக்கால் கல்லூரி முதல்வர் டாக்டர் மா. பாலமுருகனின் வழிகாட்டுதலின் கீழ் இந்நிகழ்ச்சி ஏற்பாடு செய்யப்பட்டிருந்தது. "எச்.ஐ.வி., பால்வினைத் தொற்றுக்கெதிராக இளைஞர்கள்" என்ற முக்கியக் கருப்பொருளை மையமாகக் கொண்டு நடைபெற்ற இந்த விழிப்புணர்வுப் பேரணி மற்றும் கலை நிகழ்ச்சியில் மருத்துவ மாணவர்கள், மருத்துவர்கள், செவிலியர்கள் மற்றும் மருத்துவமனையின் பல்வேறு துறை ஊழியர்கள் அனைவரும் திரளாகப் பங்கேற்றுத் தங்களது ஆதரவை வெளிப்படுத்தினர்.</p> <h3 style="text-align: justify;">நாடகம் மூலம் எச்.ஐ.வி. விழிப்புணர்வு</h3> <p style="text-align: justify;">நிகழ்ச்சியின் தொடக்கமாக, ஜிப்மர் எம்.பி.பி.எஸ். மருத்துவ மாணவர்கள் பங்கேற்ற சிறப்பு எச்.ஐ.வி. விழிப்புணர்வு நாடகம் அரங்கேறியது. இதில் எச்.ஐ.வி. தொற்று பரவாமல் தடுக்கும் நவீன வழிமுறைகள், நோயைக் கட்டுப்படுத்த தொடர்ச்சியாகச் சிகிச்சையை மேற்கொள்ள வேண்டியதன் முக்கியத்துவம் ஆகியவை குறித்து மாணவர்கள் தங்களின் திறமையான நடிப்பின் மூலம் விரிவாக எடுத்துரைத்தனர். மேலும், எச்.ஐ.வி. தொற்றால் பாதிக்கப்பட்ட நபர்களுக்கு எதிராகச் சமூகத்தில் நிலவும் பாகுபாடுகள் மற்றும் தவறான புரிதல்களைக் களைய வேண்டியதன் அவசியத்தையும் நாடகத்தின் மூலம் வலியுறுத்தினர்.</p> <h3 style="text-align: justify;">5 கி.மீ. ஓட்டப் பந்தயம் மற்றும் பங்கேற்பாளர்கள்</h3> <p style="text-align: justify;">நாடகத்தைத் தொடர்ந்து, ஜிப்மர் வளாகத்தில் 5 கி.மீ. விழிப்புணர்வு ஓட்டப் பந்தயம் மிக உற்சாகமாகத் தொடங்கியது. பேராசிரியர் டாக்டர் ஜெயகுமாரி கொடியசைத்து ஓட்டப் பந்தயத்தை முறைப்படி தொடங்கி வைத்தார். இதில் மருத்துவர்கள், செவிலியர்கள், பொறியாளர்கள், நிர்வாகப் பணியாளர்கள், ஒப்பந்த ஊழியர்கள், தூய்மைப் பணியாளர்கள், பாதுகாப்புப் பணியாளர்கள், ஓட்டுநர்கள் மற்றும் இதர பணியாளர்கள் அனைவரும் கலந்துகொண்டு ஓடினர்.</p> <h3 style="text-align: justify;">சிறப்பான ஒருங்கிணைப்பு மற்றும் பாதுகாப்பு ஏற்பாடுகள்</h3> <p style="text-align: justify;">ஜிப்மர் காரைக்கால் ரெட் ரிப்பன் கிளப் சார்பில் நடைபெற்ற இந்நிகழ்ச்சியை ஒருங்கிணைப்பாளர் டாக்டர் கார்த்திக், டாக்டர் அருண்குமார், டாக்டர் அவினாஷ் குமார், டாக்டர் நந்தினி மற்றும் ஜெஃபின் ஜோசப் ஆகியோர் ஒருங்கிணைத்துச் சிறப்பாக ஏற்பாடு செய்திருந்தனர். ஓட்டப் பந்தயத்தில் பங்கேற்றவர்களின் அவசர மருத்துவ உதவிக்காக மயக்கவியல் துறை சார்பில் சிறப்பு மருத்துவக் குழுவினரும் தயார் நிலையில் நிறுத்தப்பட்டிருந்தனர்.</p> <h3 style="text-align: justify;">மாவட்ட அளவிலான போட்டிகளுக்குத் தேர்வு</h3> <p style="text-align: justify;">புதுச்சேரி எய்ட்ஸ் கட்டுப்பாட்டு சங்கம் மற்றும் தேசிய எய்ட்ஸ் கட்டுப்பாட்டுத் திட்டத்தின் வழிகாட்டுதலின்படி நடைபெற்ற இந்நிகழ்ச்சியின் மூலம் எச்.ஐ.வி., பால்வினைத் தொற்று மற்றும் போதைப்பொருள் பயன்பாடு குறித்த விழிப்புணர்வை அதிகரித்தல், பாதுகாப்பான பாலியல் நடைமுறைகளை ஊக்குவித்தல், தன்னார்வ எச்.ஐ.வி. பரிசோதனையை வலியுறுத்துதல் ஆகியவை முன்னெடுக்கப்பட்டன.</p> <p style="text-align: justify;">இப்போட்டியில் முதல் 5 இடங்களைப் பிடித்த ஆண்கள் மற்றும் பெண்கள் வரும் 9-ம் தேதி காரைக்காலில் நடைபெறும் மாவட்ட அளவிலான 'ரெட் ரன்' போட்டியிலும், நாடகத்தில் வெற்றி பெற்ற குழு வரும் 10-ம் தேதி நடைபெறும் மாவட்ட அளவிலான நாடகப் போட்டியிலும் ஜிப்மர் சார்பில் பங்கேற்கவுள்ளனர்.</p>