<p style="text-align: justify;">தஞ்சாவூர்: பேராவூரணி அருகே 2 கயிறு தொழிற்சாலைகளில் ஏற்பட்ட பயங்கர தீ விபத்தில் ரூ.1 கோடி மதிப்பிலான பொருட்கள் சேதமடைந்தது. இந்த தீவிபத்தில் 10க்கும் மேற்பட்ட தொழிலாளர்கள் உயிர் தப்பினர். இந்த சம்பவம் பெரும் பதற்றத்தையும், பரபரப்பையும் ஏற்படுத்தி உள்ளது. </p>
<p style="text-align: justify;">தஞ்சாவூர் மாவட்டம் பேராவூரணி அருகே செங்கமங்கலம் கிராமத்தில் அமைந்திருந்த இரண்டு கயிறு தொழிற்சாலைகளில் இன்று ஏற்பட்ட பயங்கர தீ விபத்தில், சுமார் ரூ.1 கோடி மதிப்பிலான தென்னை நார், தென்னை பித், இயந்திரங்கள் மற்றும் தளவாடப் பொருட்கள் எரிந்து சேதமானது. தொழிற்சாலைகளில் பணியாற்றிக் கொண்டிருந்த 10-க்கும் மேற்பட்ட தொழிலாளர்கள் உடனடியாக வெளியேற்றப்பட்டதால் பெரும் உயிர்ச்சேதம் தவிர்க்கப்பட்டது.</p>
<p style="text-align: justify;"><br /><img src="https://feeds.abplive.com/onecms/images/uploaded-images/2026/09/09/bd2bcf371f6ee5bf2590d69758d8dc0e1788957945099733_original.jpg" /></p>
<p style="text-align: justify;">பேராவூரணி–புதுக்கோட்டை சாலையில் உள்ள செங்கமங்கலம் பகுதியில் இரண்டு கயிறு தொழிற்சாலைகள் செயல்பட்டு வந்தன. இதில் சிவகங்கை மாவட்டம் காரைக்குடியைச் சேர்ந்த ராஜகுமார், ஒரு கயிறு தொழிற்சாலையை குத்தகைக்கு எடுத்து நடத்தி வந்தார். இதற்கு அருகிலேயே ராமநாதபுரம் மாவட்டம் திருவாடானை வட்டம் புதுப்பட்டினத்தைச் சேர்ந்த அப்துல் ஜப்பார், மற்றொரு கயிறு தொழிற்சாலையை நடத்தி வந்தார்.</p>
<p style="text-align: justify;">இந்நிலையில் இன்று மதியம் 12 மணியளவில் ராஜகுமார் நடத்தி வந்த கயிறு தொழிற்சாலையில் திடீரென தீப்பிடித்தது. தொழிற்சாலையில் அதிக அளவில் இருப்பு வைக்கப்பட்டிருந்த தென்னை நார் உள்ளிட்ட எளிதில் தீப்பற்றக்கூடிய பொருட்கள் காரணமாக, தீ சில நிமிடங்களிலேயே வேகமாக பரவியது.</p>
<p style="text-align: justify;">தீயின் கொழுந்துகள் உயரமாக எழுந்ததுடன், அடர்ந்த கரும்புகை அப்பகுதி முழுவதும் பரவியது. தொடர்ந்து மளமளவென பரவிய தீ, அருகில் அமைந்திருந்த அப்துல் ஜப்பார் நடத்தி வந்த மற்றொரு கயிறு தொழிற்சாலையிலும் பரவியது. இதனால் இரண்டு தொழிற்சாலைகளும் ஒரே நேரத்தில் தீயின் பிடியில் சிக்கின.</p>
<p style="text-align: justify;">தீ விபத்து ஏற்பட்டபோது இரண்டு தொழிற்சாலைகளிலும் வடமாநிலங்களைச் சேர்ந்த 10-க்கும் மேற்பட்ட தொழிலாளர்கள் பணியாற்றிக் கொண்டிருந்தனர். திடீரென ஏற்பட்ட தீ மற்றும் புகையை பார்த்த தொழிலாளர்கள் பதற்றமடைந்தனர்.</p>
<p style="text-align: justify;">எனினும், அவர்கள் உடனடியாக தொழிற்சாலைகளில் இருந்து வெளியேற்றப்பட்டதால் பெரும் அசம்பாவிதம் தவிர்க்கப்பட்டது. சில நிமிடங்கள் தாமதமாகியிருந்தால் உயிர்ச்சேதம் ஏற்பட்டிருக்கக்கூடிய சூழ்நிலை இருந்ததாக அப்பகுதியினர் தெரிவித்தனர்.</p>
<p style="text-align: justify;">தீ விபத்து குறித்து தகவல் கிடைத்ததும் பேராவூரணி மற்றும் கீரமங்கலம் தீயணைப்பு நிலையங்களைச் சேர்ந்த தீயணைப்பு மற்றும் மீட்புப் படையினர் சம்பவ இடத்திற்கு விரைந்து சென்றனர். முதலில் பாதுகாப்பு கருதி தொழிற்சாலைகளுக்கான மின் இணைப்பு துண்டிக்கப்பட்டது. பின்னர் தீயணைப்பு வீரர்கள் தண்ணீரைப் பீய்ச்சியடித்து பல மணி நேரம் போராடி தீயை கட்டுக்குள் கொண்டு வந்தனர்.</p>
<p style="text-align: justify;">ஆனால் அதற்குள் இரு தொழிற்சாலைகளிலும் இருந்த பெரும்பாலான பொருட்கள் தீயில் எரிந்து நாசமாகிவிட்டன. இருப்பு வைக்கப்பட்டிருந்த தென்னை நார், தென்னை பித், கயிறு தயாரிப்புக்கான இயந்திரங்கள், உபகரணங்கள் மற்றும் பல்வேறு தளவாடப் பொருட்கள் தீக்கிரையாகின.</p>
<p style="text-align: justify;">இந்த தீ விபத்தில் ஏற்பட்ட பொருட்சேதம் சுமார் ரூ.1 கோடி வரை இருக்கலாம் என முதற்கட்ட தகவல்கள் தெரிவிக்கின்றன. குறிப்பாக அப்துல் ஜப்பார் நடத்தி வந்த தொழிற்சாலை பெரிய அளவில் செயல்பட்டு வந்ததாகவும், அங்கு அதிக அளவில் மூலப்பொருட்கள் மற்றும் தயாரிப்புப் பொருட்கள் இருப்பு வைக்கப்பட்டிருந்ததாகவும் கூறப்படுகிறது.</p>
<p style="text-align: justify;">இதனால் அந்த தொழிற்சாலையில் ஏற்பட்ட சேதம் அதிகமாக இருக்கலாம் என சந்தேகிக்கப்படுகிறது. இருப்பினும், சேதத்தின் முழுமையான மதிப்பு அதிகாரப்பூர்வ ஆய்வுக்குப் பிறகே தெரியவரும். தீ விபத்தின் காரணமாக பேராவூரணி–புதுக்கோட்டை சாலை முழுவதும் அடர்ந்த கரும்புகை சூழ்ந்தது. இதனால் அந்த வழியாகச் சென்ற வாகன ஓட்டிகள் கடும் அவதிக்குள்ளாகினர்.</p>
<p style="text-align: justify;">பாதுகாப்பு காரணங்களுக்காகவும், தீயணைப்பு பணிகள் நடைபெற்று வந்ததாலும் அப்பகுதியில் சுமார் ஒரு மணி நேரத்திற்கும் மேலாக வாகனப் போக்குவரத்து பாதிக்கப்பட்டது. பின்னர் தீ கட்டுக்குள் கொண்டுவரப்பட்டதைத் தொடர்ந்து போக்குவரத்து படிப்படியாக சீரானது.</p>
<p style="text-align: justify;">தீ விபத்து குறித்து தகவலறிந்த பேராவூரணி வட்டாட்சியர் பாலசுப்பிரமணியம், வருவாய்த்துறை அதிகாரிகள் மற்றும் காவல்துறையினர் சம்பவ இடத்திற்கு நேரில் சென்று ஆய்வு மேற்கொண்டனர். தீ விபத்துக்கான காரணம் என்ன என்பது குறித்து அதிகாரிகள் விசாரணை நடத்தி வருகின்றனர். மின் கசிவு உள்ளிட்ட பல்வேறு கோணங்களில் விசாரணை மேற்கொள்ளப்பட உள்ளது.</p>
<p style="text-align: justify;">ஒரே நேரத்தில் இரண்டு தொழிற்சாலைகளில் ஏற்பட்ட இந்த பயங்கர தீ விபத்து செங்கமங்கலம் மற்றும் பேராவூரணி சுற்றுவட்டாரப் பகுதிகளில் பெரும் பரபரப்பை ஏற்படுத்தியுள்ளது. தொழிலாளர்கள் அனைவரும் பாதுகாப்பாக வெளியேறியதால் உயிர்ச்சேதம் ஏற்படாதது பெரும் நிம்மதியை அளித்துள்ளது. ரூ.1 கோடி மதிப்பிலான பொருட்கள் தீயில் கருகி நாசமான சம்பவம், பேராவூரணி பகுதியில் பெரும் அதிர்ச்சியை ஏற்படுத்தியுள்ளது.</p>
1 month ago
5 
