தீபாவளி ஷாப்பிங் திருவிழா தொடக்கம்... தஞ்சை கடைவீதிகளில் அலைமோதும் மக்கள் கூட்டம்

<p style="text-align: justify;">தஞ்சாவூர்: தீபாவளிக்கு இன்னும் 6 நாட்களே உள்ள நிலையில், தஞ்சாவூர் மாநகரமே பண்டிகைக் கொண்டாட்டத்துக்குத் தயாராகிவிட்டது. தீபாவளிக்கு துணிகள் எடுக்க கடைவீதி முழுவதும் மக்கள் கூட்டமாக உள்ளது.&nbsp;</p> <p style="text-align: justify;">புத்தாடை வாங்க வேண்டும்... பட்டாசு வெடிக்க வேண்டும்... வீட்டில் முறுக்கு, அதிரசம், சீடை தயாரிக்க வேண்டும்... உறவினர்களுக்கு இனிப்புகள் வழங்க வேண்டும் என ஒட்டுமொத்தமாக மக்கள் ஷாப்பிங்கில் களமிறங்கியுள்ளனர். இதனால் தஞ்சை மாநகரின் முக்கிய கடைவீதிகளில் மக்கள் கூட்டம் அலைமோதுகிறது. ஜவுளிக்கடைகள் முதல் மளிகைக் கடைகள் வரை விற்பனை சூடுபிடித்துள்ளதால் வியாபாரிகள் உற்சாகமடைந்துள்ளனர். குடும்பம் குடும்பமாகப் படையெடுக்கும் மக்களால் காந்திஜி சாலை, கோர்ட்டு ரோடு உள்ளிட்ட பகுதிகளில் போக்குவரத்தும் நெரிசலாக மாறியுள்ளது.</p> <p style="text-align: justify;"><strong>புத்தாடை வாங்கப் படையெடுக்கும் மக்கள்!</strong></p> <p style="text-align: justify;">தீபாவளி பண்டிகையை முன்னிட்டு கடந்த சில வாரங்களாகவே தஞ்சாவூரில் ஜவுளிக்கடைகள் மற்றும் துணிக்கடைகளில் விற்பனை தொடங்கி நடைபெற்று வருகிறது. தற்போது பண்டிகை நெருங்கிவிட்டதால் புத்தாடைகள் வாங்குவதற்காக பொதுமக்கள் அதிக அளவில் கடைகளுக்கு வரத் தொடங்கியுள்ளனர்.</p> <p style="text-align: justify;">தஞ்சாவூர் காந்திஜி சாலை, கோர்ட்டு ரோடு, கீழவாசல், பழைய பஸ் நிலையம், புதிய பஸ் நிலையம் உள்ளிட்ட முக்கிய வணிகப் பகுதிகளில் மக்கள் கூட்டம் அதிகரித்துள்ளது. குறிப்பாக குடும்பத்துடன் வரும் பொதுமக்கள் தங்களுக்கும், குழந்தைகளுக்கும் தேவையான ஆடைகளை ஆர்வத்துடன் தேர்வு செய்து வாங்கிச் செல்கின்றனர். சிறுவர், சிறுமியருக்கான வண்ணமயமான ஆடைகள், பெண்களுக்கான புடவைகள், ஆண்களுக்கான சட்டைகள், பேண்ட்கள் என அனைத்து வகையான ஆடைகளின் விற்பனையும் களைகட்டியுள்ளது.</p> <p style="text-align: justify;"><strong>முறுக்கு, அதிரசம் தயாரிக்க மளிகைக் கடைகளில் கூட்டம்!</strong></p> <p style="text-align: justify;">தீபாவளி என்றாலே புத்தாடைகளுக்கு அடுத்தபடியாக வீடுகளில் தயாரிக்கப்படும் பாரம்பரிய பலகாரங்கள்தான் நினைவுக்கு வரும். இதற்காக இல்லத்தரசிகள் இப்போதே தயாராகி வருகின்றனர். முறுக்கு, அதிரசம், சீடை, லட்டு உள்ளிட்ட பலகாரங்களைச் செய்வதற்குத் தேவையான அரிசி மாவு, உளுந்து, கடலை மாவு, சர்க்கரை, வெல்லம், எண்ணெய், நெய் உள்ளிட்ட பொருட்களை வாங்குவதற்காக மளிகைக் கடைகளில் கூட்டம் அதிகரித்துள்ளது.</p> <p style="text-align: justify;">சிலர் பலகாரங்களுக்குத் தேவையான பொருட்களை மொத்தமாக வாங்கிச் செல்கின்றனர். இன்னும் சிலர் தங்களுக்குத் தேவையான அளவுக்கு சில்லறையாக வாங்குகின்றனர். இதனால் தஞ்சை மாநகரில் உள்ள மளிகைக் கடைகளிலும் வழக்கத்தைவிட விற்பனை அதிகரித்துள்ளது.</p> <p style="text-align: justify;"><strong>இனிப்பு, கார வகைகள் தயாரிப்பு மும்முரம்!</strong></p> <p style="text-align: justify;">வீடுகளில் பலகாரங்கள் தயாரிப்பது ஒருபுறம் இருக்க, மறுபுறம் இனிப்பு மற்றும் கார வகைகள் விற்பனை செய்யும் கடைகளிலும் தயாரிப்புப் பணிகள் தீவிரமடைந்துள்ளன. பல்வேறு வகையான லட்டுகள், மைசூர்பாகு, அல்வா, ஜாங்கிரி உள்ளிட்ட இனிப்பு வகைகளும், முறுக்கு, மிக்சர், காராசேவு உள்ளிட்ட கார வகைகளும் விற்பனைக்காகத் தயாராகி வருகின்றன.</p> <p style="text-align: justify;">தீபாவளி நாளில் உறவினர்கள், நண்பர்கள் மற்றும் அக்கம்பக்கத்தினருக்கு இனிப்புகள் வழங்குவது வழக்கம் என்பதால் பலரும் இனிப்புப் பெட்டிகளை வாங்க ஆர்வம் காட்டுகின்றனர். இதனால் பேக்கரிகள் மற்றும் இனிப்புக் கடைகளில் வாடிக்கையாளர்கள் வருகை அதிகரித்துள்ளது.</p> <p style="text-align: justify;"><strong>கிராமங்களில் இருந்தும் குவியும் மக்கள்... போக்குவரத்து நெரிசல்!</strong></p> <p style="text-align: justify;">தஞ்சாவூர் மாநகரைச் சுற்றியுள்ள கிராமப்புறங்களில் இருந்தும் ஏராளமான பொதுமக்கள் புத்தாடைகள் மற்றும் தீபாவளிக்குத் தேவையான பொருட்களை வாங்குவதற்காக நகருக்கு வருகின்றனர். இதனால் வார இறுதி நாட்களைப் போலவே முக்கிய வணிக வீதிகள் மக்கள் நடமாட்டத்தால் பரபரப்பாகக் காணப்படுகின்றன.</p> <p style="text-align: justify;">குறிப்பாக காந்திஜி சாலை, கோர்ட்டு ரோடு உள்ளிட்ட முக்கிய சாலைகளில் இருசக்கர வாகனங்கள், கார்கள் மற்றும் சரக்கு வாகனங்களின் எண்ணிக்கை அதிகரித்துள்ளது. கடைவீதிகளில் மக்கள் கூட்டம் அதிகரிப்பதால் சில இடங்களில் வாகனங்கள் மெதுவாக ஊர்ந்து செல்லும் நிலையும் ஏற்பட்டுள்ளது.</p> <p style="text-align: justify;"><strong>திருட்டைத் தடுக்க போலீசார் தீவிர கண்காணிப்பு!</strong></p> <p style="text-align: justify;">தீபாவளி பண்டிகையையொட்டி கடைவீதிகளில் ஏற்படும் கூட்ட நெரிசலைப் பயன்படுத்தி நகை, பணம் மற்றும் பொருட்களைத் திருடும் சம்பவங்கள் நடைபெறாமல் தடுக்க போலீசார் கண்காணிப்புப் பணியில் ஈடுபட்டுள்ளனர். முக்கிய வணிகப் பகுதிகளில் போலீசார் கண்காணிப்பைத் தீவிரப்படுத்தியுள்ளனர். மேலும், கண்காணிப்பு கேமராக்கள் மூலமாகவும் பொதுமக்களின் நடமாட்டம் கண்காணிக்கப்படுகிறது.</p> <p style="text-align: justify;">தீபாவளிக்கு இன்னும் 6 நாட்களே உள்ளதால் அடுத்தடுத்த நாட்களில் புத்தாடைகள், பட்டாசுகள், இனிப்பு வகைகள் மற்றும் பலகாரங்களுக்கான மளிகைப் பொருட்கள் வாங்குவதற்காக மக்கள் கூட்டம் மேலும் அதிகரிக்கும் என எதிர்பார்க்கப்படுகிறது. இதனால் தஞ்சாவூர் மாநகரின் வணிக வீதிகள் தீபாவளி வரை திருவிழாக் கோலத்தில் காட்சியளிக்கும் என்பதில் சந்தேகமில்லை.</p>