தண்ணீரின்றி தவிக்கும் காவிரி டெல்டா: வறட்சி மாவட்டமாக அறிவிக்க கோரி முற்றுகை

<p style="text-align: justify;">தஞ்சாவூர்: காவிரி நதியில் போதிய அளவு தண்ணீர் வராததால் குருவை சாகுபடி கடுமையாக பாதிக்கப்பட்டுள்ள நிலையில், காவிரி டெல்டா மாவட்டங்களை வறட்சியால் பாதிக்கப்பட்ட மாவட்டங்களாக அறிவிக்க வலியுறுத்தி இந்திய கம்யூனிஸ்ட் கட்சியின் தஞ்சை வடக்கு, தெற்கு மாவட்டங்கள் சார்பில் தஞ்சாவூர் மாவட்ட ஆட்சியர் அலுவலகம் முன்பு இன்று முற்றுகை போராட்டம் நடைபெற்றது.</p> <p style="text-align: justify;">போராட்டத்திற்கு மாநில பொதுச் செயலாளர் மாசிலாமணி தலைமை தாங்கினார். தஞ்சை வடக்கு மாவட்ட செயலாளர் பாரதி, தஞ்சை மாவட்ட துணைச் செயலாளர் செந்தில்குமார் ஆகியோர் முன்னிலை வகித்தனர். போராட்டத்தில் கட்சி நிர்வாகிகள், விவசாயிகள், விவசாயத் தொழிலாளர்கள் உள்ளிட்ட ஏராளமானோர் கலந்து கொண்டு கோரிக்கைகளை வலியுறுத்தி முழக்கங்களை எழுப்பினர்.</p> <p style="text-align: justify;">காவிரி டெல்டா மாவட்டங்களின் முக்கிய வாழ்வாதாரமாக விவசாயம் இருந்து வரும் நிலையில், இந்த ஆண்டு குருவை சாகுபடிக்கு தேவையான தண்ணீர் காவிரி ஆற்றில் போதிய அளவு கிடைக்காததால் விவசாயிகள் கடுமையாக பாதிக்கப்பட்டுள்ளதாக போராட்டத்தில் சுட்டிக்காட்டப்பட்டது. தண்ணீர் பற்றாக்குறையால் சாகுபடி பணிகளை மேற்கொள்ள முடியாமல் விவசாயிகள் பொருளாதார நெருக்கடியில் சிக்கியுள்ளதாகவும் தெரிவிக்கப்பட்டது.</p> <p style="text-align: justify;">இதனால் காவிரி டெல்டா மாவட்டங்களை உடனடியாக வறட்சியால் பாதிக்கப்பட்ட பகுதிகளாக அரசு அறிவிக்க வேண்டும். குருவை சாகுபடி செய்ய முடியாமல் பாதிக்கப்பட்ட விவசாயிகளுக்கு ஏக்கருக்கு ரூ.15 ஆயிரம் வீதம் நிவாரணம் வழங்க வேண்டும். விவசாய பணிகள் இல்லாததால் வருமானத்தை இழந்து தவிக்கும் விவசாயத் தொழிலாளர் குடும்பங்களுக்கு தலா ரூ.10 ஆயிரம் நிவாரண உதவி வழங்க வேண்டும் என்றும் வலியுறுத்தப்பட்டது.</p> <p style="text-align: justify;">மேலும், விவசாயிகள் பெற்றுள்ள கடன்களை முழுமையாக ரத்து செய்ய வேண்டும். வறட்சி காரணமாக பல்வேறு பகுதிகளில் குடிநீர் தட்டுப்பாடு தீவிரமடைந்து வருவதால், பொதுமக்களுக்கு தடையின்றி குடிநீர் கிடைக்கும் வகையில் போர்க்கால அடிப்படையில் நடவடிக்கை எடுக்க வேண்டும் எனவும் கோரிக்கை விடுக்கப்பட்டது.</p> <p style="text-align: justify;">அத்தியாவசியப் பொருட்களின் விலைகள் தொடர்ந்து உயர்ந்து வருவதால், வறட்சியால் பாதிக்கப்பட்ட பகுதிகளில் வசிக்கும் குடும்ப அட்டைதாரர்கள் அனைவருக்கும் அரிசி உள்ளிட்ட அத்தியாவசியப் பொருட்களை விலையின்றி வழங்க அரசு நடவடிக்கை எடுக்க வேண்டும் என்றும் போராட்டத்தில் வலியுறுத்தப்பட்டது.</p> <p style="text-align: justify;">விவசாயிகளின் வாழ்வாதாரத்தை பாதுகாக்கவும், வறட்சியின் தாக்கத்தை சமாளிக்கவும் அரசு உடனடியாக உரிய நடவடிக்கைகளை மேற்கொள்ள வேண்டும் என போராட்டத்தில் பங்கேற்றவர்கள் வலியுறுத்தினர். கோரிக்கைகளை வலியுறுத்தி நடைபெற்ற முற்றுகை போராட்டத்தால் மாவட்ட ஆட்சியர் அலுவலகம் முன்பு பரபரப்பு நிலவியது. இதில் இந்திய கம்யூனிஸ்ட் கட்சியின் மாவட்ட, ஒன்றிய மற்றும் கிளை நிர்வாகிகள் உள்ளிட்ட ஏராளமானோர் கலந்து கொண்டனர்.</p>