தஞ்சாவூரில் தமிழ்நாடு விவசாயிகள் சங்கத்தினர் காத்திருப்பு போராட்டம்

<p style="text-align: justify;">தஞ்சாவூர்: "நெல் வாங்குங்க... விவசாயிகளை பாதுகாத்திடுங்க" என்ற கோஷங்கள் முழங்க தஞ்சாவூரில் தமிழ்நாடு விவசாயிகள் சங்கத்தினர் காத்திருப்பு போராட்டம் நடத்தினர்.</p> <p style="text-align: justify;">கொள்முதல் நிலையங்களில் தேங்கும் ஆயிரக்கணக்கான நெல் மூட்டைகளை உடனடி நகர்வு செய்ய வேண்டும். லஞ்சம் ஒழிப்பு, உயிரிழந்த தொழிலாளி குடும்பத்திற்கு ரூ.50 லட்சம் இழப்பீடு உள்ளிட்ட கோரிக்கைகள் வலியுறுத்தி இந்த காத்திருப்பு போராட்டத்தில் கோஷங்கள் எழுந்தன.</p> <p style="text-align: justify;">தமிழகத்தின் நெற்களஞ்சியமாக விளங்கும் தஞ்சாவூர் மாவட்டத்தில், அரசு நேரடி நெல் கொள்முதல் நிலையங்களில் தேங்கிக் கிடக்கும் ஆயிரக்கணக்கான நெல் மூட்டைகளை உடனடியாக நகர்த்த வேண்டும் என்பதை வலியுறுத்தி, தமிழ்நாடு விவசாயிகள் சங்கம் சார்பில் தஞ்சாவூரில் காத்திருப்பு போராட்டம் நடைபெற்றது.</p> <p style="text-align: justify;">தமிழ்நாடு நுகர்பொருள் வாணிபக் கழகத்தின் முதுநிலை மண்டல மேலாளர் அலுவலகம் முன்பு நடைபெற்ற இந்த போராட்டத்திற்கு, சங்கத்தின் மாவட்ட துணைச் செயலாளர் ஆர். செந்தில்குமார் தலைமை தாங்கினார். மாவட்டச் செயலாளர் ஏ.எம். ராமலிங்கம் போராட்டத்தை தொடங்கி வைத்தார்.</p> <p style="text-align: justify;">போராட்டத்தில் கலந்து கொண்ட விவசாயிகள் மற்றும் சங்க நிர்வாகிகள், தஞ்சாவூர் மாவட்டத்தில் உள்ள பெரும்பாலான நேரடி நெல் கொள்முதல் நிலையங்களில் ஒவ்வொரு மையத்திலும் சுமார் 10 ஆயிரம் நெல் மூட்டைகள் தேங்கி கிடப்பதாக குற்றம்சாட்டினர். இந்த தேக்கநிலை காரணமாக புதிதாக நெல் கொண்டு வரும் விவசாயிகளின் விளைபொருட்களை உடனுக்குடன் கொள்முதல் செய்ய முடியாத சூழல் ஏற்பட்டுள்ளதாக அவர்கள் தெரிவித்தனர்.</p> <p style="text-align: justify;">இதன் விளைவாக, பல விவசாயிகள் தாங்கள் அறுவடை செய்து கொண்டு வரும் நெல்லை கொள்முதல் நிலையங்களில் குவித்து வைத்து, பல நாட்களாக காத்திருக்க வேண்டிய அவல நிலை உருவாகியுள்ளது. மழை, வெயில் உள்ளிட்ட இயற்கை மாற்றங்களால் நெல்லின் தரம் பாதிக்கப்படும் அபாயமும் இருப்பதாக அவர்கள் கவலை தெரிவித்தனர்.</p> <p style="text-align: justify;">எனவே, கொள்முதல் நிலையங்களில் தேக்கமடைந்துள்ள நெல் மூட்டைகளை உடனடியாக அரவை ஆலைகளுக்கும், அரசு சேமிப்பு கிடங்குகளுக்கும் அனுப்பி வைத்து, புதிய நெல்லை தாமதமின்றி கொள்முதல் செய்ய நடவடிக்கை எடுக்க வேண்டும் என்று வலியுறுத்தினர்.</p> <p style="text-align: justify;">மேலும், கொள்முதல் நிலையங்களில் நீண்ட நாட்கள் இருப்பதால் நெல் மூட்டைகளுக்கு ஏற்படும் எடையிழப்புக்காக கொள்முதல் பணியாளர்களிடம் 'ரெக்கவரி' வசூலிக்கும் நடைமுறையை உடனடியாக ரத்து செய்ய வேண்டும் என்றும் கோரிக்கை விடுத்தனர்.</p> <p style="text-align: justify;">அதேபோல், விவசாயிகளிடம் இருந்து ஒவ்வொரு நெல் மூட்டைக்கும் ரூ.40 லஞ்சம் பெறப்படுவதாக கூறப்படும் புகார்களுக்கு முற்றுப்புள்ளி வைக்க வேண்டும் என்றும், இதுகுறித்து அரசு உரிய நடவடிக்கை எடுக்க வேண்டும் என்றும் போராட்டக்காரர்கள் வலியுறுத்தினர்.</p> <p style="text-align: justify;">போராட்டத்தில் மேலும், ஆர்சுத்திப்பட்டு திறந்தவெளி நெல் சேமிப்பு கிடங்கில் நெல் மூட்டைகள் சரிந்து விழுந்து உயிரிழந்த பெண் கூலித் தொழிலாளியின் குடும்பத்திற்கு ரூ.50 லட்சம் இழப்பீடு வழங்க வேண்டும், காயமடைந்த தொழிலாளிக்கு உயர்தர மருத்துவ சிகிச்சை மற்றும் உரிய இழப்பீடு வழங்க வேண்டும் என்றும் கோரிக்கை முன்வைக்கப்பட்டது.</p> <p style="text-align: justify;">இந்த போராட்டத்தில், தமிழ்நாடு விவசாயிகள் சங்கத்தின் தேசிய குழு உறுப்பினர் சொ. பாஸ்கர், இந்திய கம்யூனிஸ்ட் கட்சியின் தெற்கு மாவட்ட செயலாளர் கோ. சக்திவேல், மாநகர செயலாளர் ஆர். முத்துக்குமரன் உள்ளிட்ட பல்வேறு விவசாய சங்க நிர்வாகிகள் மற்றும் விவசாயிகள் திரளாக கலந்து கொண்டு கோரிக்கைகளை வலியுறுத்தினர்.</p> <p style="text-align: justify;">விவசாயிகளின் உழைப்புக்கு உரிய மதிப்பும், கொள்முதல் நடைமுறைகளில் வெளிப்படைத்தன்மையும் உறுதி செய்யப்பட வேண்டும் என்ற கோரிக்கையுடன் நடைபெற்ற இந்த காத்திருப்பு போராட்டம், தஞ்சாவூரில் கவனம் ஈர்த்தது.</p>