<p>CAT 2024 Admission: ஐஐஎம்களில் எம்பிஏ படிக்க அவகாசம் நீட்டிக்கப்பட்டுள்ளது. இந்தப் படிப்புகளில் சேர நடத்தப்படும் கேட் நுழைவுத் தேர்வுக்கு செப்டம்பர் 20ஆம் தேதி வரை விண்ணப்பிக்கலாம் </p>
<p>நாடு முழுவதும் புகழ்பெற்ற மேலாண்மை நிறுவனங்களான ஐஐஎம்களில் எம்பிஏ எனப்படும் முதுகலை மேலாண்மைப் படிப்புகள் கற்பிக்கப்பட்டு வருகின்றன. இந்தப் படிப்புகளில் சேர கேட் (CAT – Common Admission Test) என்னும் நுழைவுத் தேர்வு நடத்தப்பட்டு வருகிறது. ஆண்டுதோறும் நாடு முழுவதும் நடத்தப்படும் இந்தத் தேர்வை சுமார் 2 லட்சம் மாணவர்கள் எழுதுகின்றனர். 2024ஆம் ஆண்டுக்கான கேட் தேர்வு நவம்பர் 24ஆம் தேதி நடைபெற உள்ளது. </p>
<p>ஐஐஎம்கள் நாடு முழுவதும் அகமதாபாத், அமிர்தசரஸ், பெங்களூரு, புத்தகயா, கல்கத்தா, இந்தூர், ஜம்மு, காஷிபூர், கோழிக்கோடு, லக்னோ, நாக்பூர், ராய்ப்பூர், ராஞ்சி, ரோஹ்டக், சம்பல்பூர், ஷில்லாங், சிர்மவுர், திருச்சி, உதய்பூர், விசாகப்பட்டிணம் ஆகிய இடங்களில் செயல்பட்டு வருகின்றன.</p>
<h2><strong>விண்ணப்பிக்க என்ன தகுதி?</strong></h2>
<p>இந்தத் தேர்வுக்கு விண்ணப்பிக்கும் விண்ணப்பதாரர்கள் அங்கீகரிக்கப்பட்ட பல்கலைக்கழகத்தில் இளங்கலை பட்டப் படிப்பில் குறைந்தபட்சம் 50% மதிப்பெண்கள் அல்லது அதற்கு சமமான சி.ஜி.பி.ஏ.வைப் பெற்றிருக்க வேண்டும். தாழ்த்தப்பட்ட, பழங்குடியின, மாற்றுத்திறனாளி மாணவர்கள் இட ஒதுக்கீட்டின்கீழ் குறைந்தபட்சம் 45 சதவீத மதிப்பெண்களைப் பெற்றிருக்க வேண்டும். </p>
<h2><strong>3 </strong><strong>கட்டங்களாகத்</strong> <strong>தேர்வு</strong></h2>
<p>இந்த ஆண்டு ஐஐஎம் கல்கத்தா கேட் தேர்வை நடத்துகிறது. பொது நுழைவுத் தேர்வு தேர்வு 3 கட்டங்களாக நடைபெற உள்ளது. குறிப்பாக காலை 8.30 மணி முதல் 10.30 மணி வரை முதல்கட்டத் தேர்வும் 2ஆவது கட்டத் தேர்வு 12.30 முதல் 2.30 மணி வரையும் மாலை 4.30 மணி முதல் 6.30 மணி வரையிலும் நடைபெற உள்ளது. </p>
<h2>விண்ணப்பக் <strong>கட்டணம் </strong></h2>
<p>எஸ்சி, எஸ்டி, மாற்றுத்திறனாளி தேர்வர்களுக்கு - ரூ.1,250 கட்டணம் நிர்ணயிக்கப்பட்டுள்ளது. அதேபோல பிற அனைத்துத் தேர்வர்களுக்கும் - ரூ.2500 கட்டணமாக நிர்ணயம் செய்யப்பட்டுள்ளது. </p>
<h2><strong>இடங்கள் இட ஒதுக்கீடு</strong></h2>
<p>எம்பிஏ படிப்புகளில் சேர 15 சதவீத இடங்கள் பட்டியல் சாதி மாணவர்களுக்கு ஒதுக்கப்பட்டுள்ளது. பழங்குடி (ST) வேட்பாளர்களுக்கு சுமார் 7.5 சதவீதம், 27 சதவீத இடங்கள் கிரீமி லேயர் அல்லாத (NC-OBC) இதர பிற்படுத்தப்பட்ட வகுப்பினருக்கு ஒதுக்கப்பட்டுள்ளன. அதேபோல பொருளாதாரத்தில் பின்தங்கிய பிரிவினருக்கு (EWS) 10 சதவீத இடங்கள் ஒதுக்கப்பட்டுள்ளன.<br /><br /></p>
<h2><strong>விண்ணப்பிப்பது எப்படி</strong><strong>?</strong></h2>
<ul>
<li>தேர்வர்கள் <a href="https://cdn.digialm.com/EForms/configuredHtml/32842/89884/Registration.html" rel="nofollow">https://cdn.digialm.com/EForms/configuredHtml/32842/89884/Registration.html</a> என்ற இணைப்பை க்ளிக் செய்து கொள்ளவும். </li>
<li>போதிய தகவல்களை உள்ளிட்டு முன்பதிவு செய்ய வேண்டும்.</li>
<li>தொடர்ந்து <a href="https://cdn.digialm.com/EForms/configuredHtml/32842/89884/login.html" rel="nofollow">https://cdn.digialm.com/EForms/configuredHtml/32842/89884/login.html </a>என்ற இணைப்பை க்ளிக் செய்து, தேர்வர்கள் விண்ணப்பிக்கலாம்.</li>
</ul>
<p>கூடுதல் விவரங்களுக்கு: <strong><a href="https://iimcat.ac.in/" rel="nofollow">https://cdn.digialm.com/per/g06/pub/32842/EForms/CAT24/CAT_2024_Information_Bulletin.pdf</a></strong></p>
<p><strong>முழு</strong> <strong>விவரங்களை</strong> <strong>அறிய</strong><strong>: <a href="https://iimcat.ac.in/" rel="nofollow">https://iimcat.ac.in/</a></strong></p>
1 year ago
7 
