"வாடி வாடி கைப்படாத சிடி..." ஆபாசப் பாட்டுக்கு குத்தாட்டம் போட்ட அமைச்சர்..!

<p style="text-align: justify;"><strong>மதுரை:</strong> மதுரை மாவட்டம் மேலூர் அரசு ஆண்கள் மேல்நிலைப் பள்ளி வளாகத்தில் நடைபெற்ற நிகழ்ச்சி ஒன்றில், தமிழக உயர்கல்வித்துறை அமைச்சர் விஸ்வநாதன் மற்றும் அரசியல் கட்சி நிர்வாகிகள் ஆபாச வரிகள் கொண்ட குத்துப் பாடலுக்கு நடனமாடிய சம்பவம் பெரும் சர்ச்சையை ஏற்படுத்தியுள்ளது. கல்வி கற்கும் புனிதமான பள்ளி வளாகத்திற்குள் அரசியல் பதாகைகள் வைக்கப்பட்டதோடு, பொறுப்புள்ள அமைச்சரே மேடையில் குத்தாட்டம் போட்டது பெற்றோர் மற்றும் பொதுமக்களிடையே பலத்த அதிருப்தியையும் முகச்சுழிப்பையும் ஏற்படுத்தியுள்ளது.</p> <h3 style="text-align: justify;">விழிப்புணர்வு மாரத்தான்..</h3> <p style="text-align: justify;">தமிழக முதல்வர் ஜோசப் <a title="விஜய்" href="https://tamil.abplive.com/topic/tvk-vijay" data-type="interlinkingkeywords">விஜய்</a> (ஜூன் 22) மற்றும் காங்கிரஸ் கட்சியின் அகில இந்தியத் தலைவர் ராகுல் காந்தி (ஜூன் 19) ஆகியோரின் பிறந்தநாட்களை முன்னிட்டு, மதுரை மாவட்டம் மேலூரில் பிரம்மாண்ட மாரத்தான் போட்டிக்கு ஏற்பாடு செய்யப்பட்டிருந்தது. 'போதை இல்லா தமிழகம்' மற்றும் 'பெண்கள் பாதுகாப்பு' ஆகிய மிக முக்கிய சமூகக் கருத்துக்களை வலியுறுத்தி, இளைஞர்கள் மற்றும் மாணவர்களிடையே விழிப்புணர்வை ஏற்படுத்தும் நோக்கில் இந்த மாரத்தான் போட்டி நடத்தப்படுவதாக அறிவிக்கப்பட்டிருந்தது.</p> <p style="text-align: justify;">இந்த மாரத்தான் போட்டி மேலூர் அரசு ஆண்கள் மேல்நிலைப் பள்ளி வளாகத்தில் இருந்து தொடங்குவதாகத் திட்டமிடப்பட்டு, போட்டியைத் தொடங்கி வைப்பதற்காகத் தமிழக உயர்கல்வித்துறை அமைச்சர் விஸ்வநாதன் சிறப்பு விருந்தினராக வருகை தந்திருந்தார்.</p> <h3 style="text-align: justify;">பள்ளி வளாகத்தை ஆக்கிரமித்த தவெக பதாகைகள்: பெற்றோர் அதிர்ச்சி</h3> <p style="text-align: justify;">அரசு விதிமுறைகளின்படி, கல்வி நிறுவனங்களின் வளாகத்திற்குள் எந்தவொரு அரசியல் கட்சி சார்ந்த அடையாளங்களோ, விளம்பரங்களோ இருக்கக் கூடாது என்பது விதியாகும். ஆனால், இந்த விழிப்புணர்வு மாரத்தான் போட்டியை முன்னிட்டு, மேலூர் அரசு ஆண்கள் மேல்நிலைப் பள்ளி வளாகம் முழுவதும் தமிழக வெற்றிக் கழகத்தின் (தவெக) சார்பில் பிரம்மாண்டமான விளம்பரப் பதாகைகளும் (Flex Boards), கட்சிக் கொடிகளும் வைக்கப்பட்டிருந்தன.</p> <p style="text-align: justify;">விழிப்புணர்வு நிகழ்ச்சி என்ற பெயரில் ஒட்டுமொத்த பள்ளி வளாகத்தையும் அரசியல் கட்சி மாநாடு போல மாற்றியமைத்ததைக் கண்டு, அங்கு வந்திருந்த பெற்றோர்களும், மாணவர்களும் அதிர்ச்சியடைந்தனர்.</p> <p style="text-align: justify;">"அரசியல் கலப்பு இல்லாத இடமாக இருக்க வேண்டிய பள்ளி வளாகத்திற்குள், ஆளுங்கட்சி மற்றும் கூட்டணி கட்சித் தலைவர்களின் பிறந்தநாளுக்காக விதிகளை மீறி பதாகைகள் வைக்க அனுமதி கொடுத்தது யார்?" என்று சமூக ஆர்வலர்கள் பலரும் அடுக்கடுக்கான கேள்விகளை எழுப்பி, தங்களது கண்டனங்களைப் பதிவு செய்தனர்.</p> <h3 style="text-align: justify;">துவங்கி வைக்கப்பட்டு வீதிகளில் வலம் வந்த பேரணி</h3> <p style="text-align: justify;">சர்ச்சைகளுக்கு மத்தியிலும், திட்டமிட்டபடி மாரத்தான் போட்டி நான்கு பிரிவுகளாகத் தொடங்கியது. இதனைத் தமிழக உயர்கல்வித்துறை அமைச்சர் விஸ்வநாதன் கொடியசைத்துத் தொடங்கி வைத்தார். அரசு ஆண்கள் மேல்நிலைப் பள்ளியில் இருந்து புறப்பட்ட இந்த விழிப்புணர்வுப் பேரணி, மேலூரின் முக்கிய வீதிகளான பெரியகடை வீதி, செக்கடி பஜார், பேருந்து நிலையம், சானல் ரோடு, அரசு மருத்துவமனை சாலை மற்றும் நகைக்கடை பஜார் உள்ளிட்ட முக்கியப் பகுதிகள் வழியாகச் சென்றது.</p> <p style="text-align: justify;">'போதைக்கு எதிராக மாறுவோம்', 'பெண்களைப் பாதுகாப்போம்' என்ற பதாகைகளை ஏந்தியபடி நூற்றுக்கணக்கானோர் இந்த மாரத்தானில் ஓடினர். நகரத்தின் முக்கிய வீதிகளை வலம் வந்த இந்த மாரத்தான் பேரணி, இறுதியாக மீண்டும் மேலூர் அரசுப் பள்ளி வளாகத்திலேயே வந்தடைந்து நிறைவு பெற்றது.</p> <h3 style="text-align: justify;">"வாடி வாடி கைப்படாத சிடி..." ஆபாசப் பாட்டுக்கு அமைச்சரின் குத்தாட்டம்!</h3> <p style="text-align: justify;">மாரத்தான் போட்டி நிறைவடைந்ததைத் தொடர்ந்து, பள்ளி வளாகத்தில் அமைக்கப்பட்டிருந்த மேடையில் கலை நிகழ்ச்சிகள் மற்றும் பாராட்டு விழா நடைபெற்றது. அப்போது, ஒலிபெருக்கியில் 'வாடி வாடி வாடி கைப்படாத சிடி' என்ற ஆபாசமான மற்றும் இரட்டை அர்த்த வரிகள் கொண்ட திரைப்படக் குத்துப் பாடல் ஒலிக்கவிடப்பட்டது.</p> <p style="text-align: justify;">பாடலின் சத்தம் கேட்டதும், மேடையில் இருந்த தமிழக உயர்கல்வித்துறை அமைச்சர் விஸ்வநாதன், <a title="தவெக" href="https://tamil.abplive.com/topic/tvk" data-type="interlinkingkeywords">தவெக</a> மேலூர் நகர இணைச் செயலாளர் சுபாஷினி மற்றும் அங்கிருந்த கட்சி நிர்வாகிகள் தங்களை மறந்து குத்தாட்டம் போடத் தொடங்கினர். மாணவர்களும், பெற்றோர்களும் பார்த்துக் கொண்டிருக்கும்போதே, பொறுப்புள்ள பதவியில் இருக்கும் ஓர் உயர்கல்வித்துறை அமைச்சர், பள்ளி மேடையில் சினிமா பாணியில் ஆபாசப் பாட்டுக்குக் கைதட்டி, இடுப்பை அசைத்து நடனமாடியது அங்கிருந்தவர்களை அதிர்ச்சியில் உறைய வைத்தது.</p> <h3 style="text-align: justify;">பொதுமக்கள் மற்றும் சமூக ஆர்வலர்கள் கடும் கண்டனம்</h3> <p style="text-align: justify;">போதை ஒழிப்பு மற்றும் பெண்கள் பாதுகாப்பு குறித்துப் பேச வந்த இடத்தில், ஆபாசப் பாட்டுக்கு அமைச்சரே நடனமாடிய கூத்து சமூக ஊடகங்களிலும் வெளியாகி பெரும் பேசுபொருளாக மாறியுள்ளது. இதுகுறித்து அப்பகுதியைச் சேர்ந்த பெற்றோர் ஒருவர் கூறுகையில்; "மாணவர்களுக்கு ஒழுக்கத்தைக் கற்றுத்தர வேண்டிய பள்ளி வளாகத்தில் இது போன்ற ஆபாசப் பாடல்களை ஒலிபரப்புவதே தவறு. இதில் மாநிலத்தின் உயர்கல்வித் துறையை கவனிக்கும் அமைச்சரே முன்னின்று நடனமாடுவது, மாணவர்களுக்கு என்ன மாதிரியான முன்னுதாரணத்தை ஏற்படுத்தும்? இதை வன்மையாகக் கண்டிக்கிறோம்" என்றார்.</p> <p style="text-align: justify;">சமூக ஆர்வலர்கள் தரப்பில், "அரசுப் பள்ளி வளாகங்களை அரசியல் ஆதாயங்களுக்காகப் பயன்படுத்துவதை அரசு உடனடியாகத் தடை செய்ய வேண்டும். விழிப்புணர்வு என்ற பெயரில் ஆபாசக் கூத்துக்களை அரங்கேற்றியவர்கள் மீது உரிய நடவடிக்கை எடுக்க வேண்டும்" என வலியுறுத்தப்பட்டு வருகிறது. இந்தச் சம்பவம் மேலூர் மற்றும் மதுரை மாவட்ட அரசியல் வட்டாரத்தில் தற்போதும் பெரும் புயலைக் கிளப்பி வருகிறது.</p>