<p>கோழி முட்டைகளில் மஞ்சள் கருவைச் சாப்பிடக் கூடாது என்று பகிரப்படும் தகவல்களில் உண்மை இல்லை, அதைக் கட்டாயம் சாப்பிட வேண்டும் என்று பொதுநல மருத்துவர் ஃபரூக் அப்துல்லா கூறி உள்ளார்.</p>
<p><strong>இதுகுறித்து அவர் தனது சமூக ஊடக பக்கத்தில் வெளியிட்ட பதிவு:</strong></p>
<p>’’கிளினிக்கில் தசை வலி, உடல் சோர்வு என்று என்னைச் சந்தித்த சகோதரி ஒருவரிடம் தாங்கள் தினமும் புரதச்சத்து தேவையான அளவு உட்கொள்கிறீர்களா? என்று கேட்டேன்.</p>
<p>’’ஆம் சார்.. தினமும் எங்க வீட்ல எல்லாரும் கண்டிப்பா ஆளுக்கு ஒரு முட்டை சாப்புடுறோம்’’ என்றார்.</p>
<p>ரொம்ப சந்தோசம் மா..</p>
<p>ஆனா.. முட்டை வெள்ளைக்கரு மட்டும்தான் சாப்டுவோம். மஞ்சள் கருவ சாப்ட மாட்டோம்.</p>
<p>அது ஏன்மா?</p>
<p>என் வீட்டுக்காரர் மஞ்சள் கரு சாப்ட்டா கொலஸ்ட்ரால் அதிகமாகிடும்னு சொல்லி என் புள்ளைங்களக் கூடசாப்ட விடமாட்டேங்கறாரு சார்.</p>
<p>அவரது வீட்டுக்காரரிடம் கேட்டேன்.</p>
<p>"ஏன் சார் இப்டி பண்றீங்க? கொலஸ்ட்ரால்னாலே கெட்டதுனு உங்களுக்கு யாரு சார் சொன்னது..?</p>
<p>நமக்கு தேவையான பல ஹார்மோன்கள், நம்ம செல்கள், நமது மூளைனு எல்லாத்துலையும் கொலஸ்ட்ரால் இருக்கு. கொலஸ்ட்ரால் நமக்கு இன்றியமையாத தேவை சார். நம்ம கொலஸ்ட்ரால் உணவு மூலமா சாப்டாட்டியும் நம்ம உடல் கொலஸ்ட்ராலை உற்பத்தி செஞ்சுக்கும்.</p>
<p>நம்ம உடம்புக்கு கெடுதினா.. ஏன் உடலே அதை உற்பத்தி செய்யணும்?"</p>
<p>"சரி சார் இனிமே முட்டையை முழுசா சாப்டுறோம்"</p>
<p>நான் விளையாட்டுக்காக "இனிமேலும் நீங்க முட்டையை மஞ்சள் கரு இல்லாம சாப்டுவீங்கன்னா தயவு செஞ்சு அந்த ஐந்து முட்டைகளோட மஞ்சள் கருக்களை வீணாக்காம என்கிட்ட கொண்டாந்து கொடுத்துருங்க.. ஃபீஸ்ல கூட கழிச்சுக்குறேன் " என்றேன்</p>
<p>அதற்கு அந்த சகோதரி கூறுகிறார்</p>
<p>"இல்ல சார் .. நாங்க தினமும் ஐந்து மஞ்சள் கருவ நாங்க வளர்க்குற நாய்க்கு சோறோட பிசஞ்சு வச்சுருவோம். சூப்பரா சாப்ட்டு இப்போ நல்லா இருக்கு சார்.."</p>
<p>முட்டை மஞ்சள் கருவுல</p>
<p>கண்ணுக்குத் தேவையான விட்டமின் ஏ</p>
<p>எலும்புக்கு தேவையான விட்டமின் டி</p>
<p>ரத்த உறைதலுக்குத் தேவையான விட்டமின் கே</p>
<p>ஆண்டி ஆக்சிடெண்ட் வேலை பார்க்கும் விட்டமின் ஈ</p>
<p>செல் வளர்ச்சிக்குத் தேவையான ஃபோலிக் அமிலம்</p>
<p>மூளைக்குத் தேவையான கோலின் லூடின், சியாசான்தின் ஆகிய ஆண்டி ஆக்சிடண்ட்…</p>
<p>இவ்வளவு தம்மாத்தூண்டு மஞ்சள் கருவுக்குள்ள ஒழிஞ்சுருக்கு ..</p>
<p>உங்க நாய்க்கும் கண்டிப்பா முட்டை கொடுங்க.</p>
<p>ஆனா இனிமே முழு முட்டையா நீங்களும் சாப்டுங்க... என்றேன்.</p>
<p>ஓகே.. ஓகே என்று தலையாட்டி குடும்பத்தோடு விடைபெற்றனர்..</p>
<p>முட்டை என்றால் அது முழு முட்டையே..</p>
<p>அதில் வெள்ளை என்பது அதன் சட்டை மட்டுமே..</p>
<p>முட்டையை முழுதாக உண்போம்</p>
<p>அதன் முழுப் பயனையும் முழுமையாகப் பெறுவோம்’’ என்று மருத்துவர் ஃபரூக் அப்துல்லா தெரிவித்துள்ளார்.</p>
<p><iframe class="vidfyVideo" style="border: 0px;" src="https://tamil.abplive.com/web-stories/lifestyle/does-delhi-have-slums-like-dharavi-226658" width="631" height="381" scrolling="no"></iframe></p>
5 months ago
5 
