மயிலாடுதுறை மாவட்டத்தில் உஷார் நிலையில் 14 காவல் நிலையங்கள்.. ஏன் தெரியுமா..?

<p style="text-align: justify;"><strong>மயிலாடுதுறை:</strong> மயிலாடுதுறை மாவட்டத்தில் வடகிழக்குப் பருவமழை தீவிரமடைந்து வரும் நிலையில், பொதுமக்களின் பாதுகாப்பு மற்றும் பேரிடர் மேலாண்மை நடவடிக்கைகள் குறித்த ஆய்வுக் கூட்டம் மயிலாடுதுறை மாவட்ட காவல் அலுவலகத்தில் நடைபெற்றது.</p> <p style="text-align: justify;">மாவட்ட காவல் கண்காணிப்பாளர் Dr.B.சினேஹா ப்ரியா, தலைமையில் நடைபெற்ற இக்கூட்டத்தில் இரு உட்கோட்டத் துணைக் காவல் கண்காணிப்பாளர்கள் மற்றும் உயர் காவல்துறை அதிகாரிகள் பங்கேற்றனர். பருவமழை காலங்களில் ஏற்படக்கூடிய இன்னல்களைத் தவிர்க்கும் பொருட்டு மேற்கொள்ளப்பட வேண்டிய பல்வேறு முன்னெச்சரிக்கை நடவடிக்கைகள் குறித்து விரிவாக ஆலோசிக்கப்பட்டது.</p> <h3 style="text-align: justify;">தாழ்வான பகுதிகள் மற்றும் ஆபத்தான கட்டடங்கள் கண்டறிதல்</h3> <p style="text-align: justify;">மாவட்டத்திலுள்ள 14 சட்டம் ஒழுங்கு காவல் நிலைய எல்லைகளுக்கு உட்பட்ட பகுதிகளில் வெள்ளப் பாதிப்பு ஏற்படக்கூடிய தாழ்வான பகுதிகள் மற்றும் மழைநீர் தேங்கக் கூடிய இடங்கள் தீவிரமாகக் கண்காணிக்கப்பட்டு வருகின்றன. மேலும், தொடர் மழையின் காரணமாக இடிந்து விழும் அபாயத்தில் உள்ள பழைய மற்றும் ஆபத்தான கட்டடங்களை முன்கூட்டியே கண்டறிந்து, அங்கு வசிக்கும் மக்களைப் பாதுகாப்பான இடங்களுக்கு மாற்றுவது குறித்து உரிய முன்னெச்சரிக்கை நடவடிக்கைகள் மேற்கொள்ள அனைத்து காவல் அதிகாரிகளுக்கும் அறிவுறுத்தப்பட்டது.</p> <h3 style="text-align: justify;">நிவாரண முகாம்கள் மற்றும் பொதுமக்களின் பாதுகாப்பு ஏற்பாடுகள்</h3> <p style="text-align: justify;">மழையால் பாதிக்கப்படும் மக்களை உடனடியாகத் தங்க வைப்பதற்காகத் தயார் நிலையில் உள்ள நிவாரண முகாம்கள் மற்றும் சமூகக் கூடங்களின் தற்போதைய நிலை குறித்து ஆய்வு செய்யப்பட்டது. ஒவ்வொரு காவல் நிலைய எல்லையிலும் வசிக்கும் முதியவர்கள், கர்ப்பிணிப் பெண்கள் மற்றும் குழந்தைகளின் பாதுகாப்பிற்கு முதலிடம் அளித்து அவர்களின் தேவைகள் உறுதி செய்யப்பட வேண்டும் என வலியுறுத்தப்பட்டது.&nbsp;</p> <p style="text-align: justify;">மேலும், முகாம்களில் தங்க வைக்கப்படும் மக்களுக்குத் தேவையான உணவு, குடிநீர் மற்றும் அத்தியாவசியப் பொருட்கள் தடையின்றி கிடைப்பதற்கான ஏற்பாடுகள் குறித்து மாவட்ட நிர்வாகத்துடன் இணைந்து திட்டமிடப்பட்டது.</p> <h3 style="text-align: justify;">மருத்துவ உதவி மற்றும் மீட்புக் குழுக்களுடன் ஒருங்கிணைப்பு</h3> <p style="text-align: justify;">பேரிடர் காலங்களில் அவசர மருத்துவ உதவி மற்றும் ஆம்புலன்ஸ் சேவைகள் எவ்விதத் தடையுமின்றி பொதுமக்களைச் சென்றடைவதை உறுதி செய்யுமாறு கேட்டுக் கொள்ளப்பட்டது. தீயணைப்பு மற்றும் மீட்புப் பணிகள் துறையினருடன் இணைந்து கூட்டாகச் செயல்படுவதன் மூலம் மீட்புப் பணிகளை விரைவுபடுத்த முடியும் எனக் கூட்டத்தில் விவாதிக்கப்பட்டது. கடந்த காலங்களில் மழை மற்றும் வெள்ளத்தால் அதிகம் பாதிக்கப்பட்ட பகுதிகள் பற்றிய தரவுகள் ஆய்வு செய்யப்பட்டு, அந்தப் பகுதிகளில் மீண்டும் பாதிப்புகள் ஏற்படாத வண்ணம் துறை சார்ந்த அரசு அதிகாரிகளுடன் ஒருங்கிணைந்து செயலாற்ற அறிவுறுத்தப்பட்டது.</p> <h3 style="text-align: justify;">காவல்துறையின் வாகனங்கள் மற்றும் மீட்பு உபகரணங்கள் நேரடி ஆய்வு</h3> <p style="text-align: justify;">பேரிடர் மீட்புப் பணிகளுக்காகக் காவல்துறையின் வசம் உள்ள அவசர கால வாகனங்கள், மீட்பு உபகரணங்கள், அவற்றின் செயல்பாட்டுத் திறன் மற்றும் மீட்புப் பணியில் ஈடுபடத் பயிற்சி பெற்ற காவலர்களின் எண்ணிக்கை ஆகியவற்றை மாவட்ட காவல் கண்காணிப்பாளர் அவர்கள் நேரில் பார்வையிட்டு ஆய்வு செய்தார். அனைத்து காவல் நிலையங்களும் எந்த நேரத்திலும் எதிர்கொள்ளும் வகையில் முழுமையான தயார் நிலையில் இருக்க வேண்டும் என அவர் அறிவுறுத்தல்களை வழங்கினார்.</p> <h3 style="text-align: justify;">பொதுமக்களுக்கான அவசர உதவி மற்றும் கட்டுப்பாட்டு அறை எண்</h3> <p style="text-align: justify;">வடகிழக்குப் பருவமழைக் காலத்தில் பொதுமக்கள் பாதுகாப்பு தொடர்பான அவசரத் தகவல்களைத் தெரிவிக்கவும், உடனடி உதவிகளைப் பெறவும் மயிலாடுதுறை மாவட்டத்தில் 24 மணி நேரமும் செயல்படும் கட்டுப்பாட்டு அறை அமைக்கப்பட்டுள்ளது. பொதுமக்கள் எவ்விதத் தயக்கமுமின்றி 04364-222588 என்ற தொலைபேசி எண்ணைத் தொடர்பு கொண்டு தங்கள் தேவைகளையும் புகார்களையும் தெரிவிக்கலாம் என மாவட்டக் காவல் துறை சார்பில் கேட்டுக்கொள்ளப்படுகிறார்கள்.</p>