<p class="p1"><span class="s1">‘</span>பிக்பாஸ் தமிழ்<span class="s1"> 7’ </span>நிகழ்ச்சியின் மூலம் பிரபலமான நடிகர் பிரதீப் ஆண்டனி<span class="s1">, </span>தனது மனைவி பூஜா சக்தியைப் பிரிவதாக சமூக வலைதளப் பதிவின் மூலம் தெரிவித்திருப்பது பரபரப்பை ஏற்படுத்தியுள்ளது<span class="s1">. </span>திருமண வாழ்க்கையில் ஏற்பட்ட பிரச்சினைகள் குறித்து மிகவும் உணர்ச்சிப்பூர்வமாக பதிவிட்ட அவர்<span class="s1">, </span>பின்னர் அந்தப் பதிவை நீக்கியுள்ளார்<span class="s1">.</span></p>
<p class="p1">பிரதீப் ஆண்டனி<span class="s1">, </span>பூஜா சக்தியை கடந்த<span class="s1"> 2024</span>ஆம் ஆண்டு நவம்பர் மாதம் திருமணம் செய்துகொண்டார்<span class="s1">. </span>சில ஆண்டுகள் காதலித்து வந்த இருவரும் திருமணத்துக்குப் பிறகு குடும்ப வாழ்க்கையைத் தொடங்கினர்<span class="s1">. </span>இந்த ஆண்டு ஏப்ரல் மாதம் இருவருக்கும் ஆண் குழந்தை பிறந்தது<span class="s1">. </span>குழந்தை பிறந்த பிறகு தனது வாழ்க்கையில் ஏற்பட்ட மாற்றம் குறித்தும் பிரதீப் தனது பதிவில் குறிப்பிட்டிருந்தார்<span class="s1">.</span></p>
<h2 class="p1">மனைவியை பிரிந்த பிரதீப் ஆண்டனி</h2>
<p class="p1">குழந்தை பிறப்பதற்கு முன்பு தந்தையாகும் பொறுப்பு குறித்து தான் பெரிதாக யோசிக்கவில்லை என்றும்<span class="s1">, </span>ஆனால் குழந்தை பிறந்த பிறகு அதனுடன் மிகவும் நெருக்கமாகிவிட்டதாகவும் பிரதீப் தெரிவித்துள்ளார்<span class="s1">. </span>குழந்தையுடன் இருந்த ஒவ்வொரு நாளும் தனக்கு புதிய உணர்வை கொடுத்ததாகவும் அவர் கூறியுள்ளார்<span class="s1">. </span>ஆனால்<span class="s1">, </span>கடந்த ஒரு மாதமாக குழந்தை தன்னுடன் இல்லை என்றும் வேதனையுடன் குறிப்பிட்டுள்ளார்<span class="s1">.</span></p>
<h2 class="p1"><span class="s1">தவறான நபரை திருமணம் செய்துவிட்டேன்</span></h2>
<p class="p1">தனது திருமண வாழ்க்கை குறித்து பேசிய பிரதீப்<span class="s1">, </span>இருவருக்கும் இடையே தொடர்ந்து கருத்து மோதல்கள் ஏற்பட்டதாகவும்<span class="s1">, </span>ஒருவரையொருவர் புரிந்துகொள்ள முடியாத சூழல் உருவானதாகவும் தெரிவித்துள்ளார்<span class="s1">. </span>மேலும்<span class="s1">, “</span>தவறான நபரை திருமணம் செய்துவிட்டேன்<span class="s1">” </span>என்ற எண்ணம் தனக்கு ஏற்பட்டதாகவும்<span class="s1">, </span>அந்த உறவு தன்னை ஒவ்வொரு நாளும் மோசமான நபராக மாற்றியதாகவும் தனது பதிவில் தெரிவித்துள்ளார்<span class="s1">. </span>திருமண வாழ்க்கையில் தொடர்ந்து மூச்சுத்திணறுவது போல் உணர்வதால் அதிலிருந்து விலக முடிவு செய்துள்ளதாகவும் அவர் கூறியுள்ளார்<span class="s1">. </span></p>
<p class="p1">மேலும்<span class="s1">, </span>பெற்றோர் தொடர்ந்து சண்டையிட்டு ஒருவரையொருவர் வெறுக்கும் சூழலில் குழந்தை வளர்வதைவிட<span class="s1">, </span>தாயுடன் இருப்பதே குழந்தைக்கு நல்லது என தான் கருதுவதாகவும் பிரதீப் தெரிவித்துள்ளார்<span class="s1">. </span>குழந்தையை பிரிந்திருப்பது தனக்கு மிகுந்த வேதனையை ஏற்படுத்துவதாகவும் அவர் குறிப்பிட்டுள்ளார்<span class="s1">.</span></p>
<p class="p1">இதனிடையே<span class="s1">, </span>பிரதீப் ஆண்டனியின் இந்தப் பதிவு சமூக வலைதளங்களில் பேசுபொருளான நிலையில்<span class="s1">, </span>அவர் பின்னர் அதனை நீக்கினார்<span class="s1">. </span>இதையடுத்து தனது எக்ஸ் பக்கத்தில்<span class="s1">, </span>தனிப்பட்ட விஷயத்தை சமூக வலைதளத்தில் பதிவிட்டது தனது தவறு என்றும்<span class="s1">, </span>அந்த நேரத்தில் ஏற்பட்ட உணர்ச்சியின் வெளிப்பாடாகவே அந்தப் பதிவு இருந்ததாகவும் தெரிவித்துள்ளார்<span class="s1">. </span></p>
<p class="p1"><span class="s1">‘</span>அருவி<span class="s1">’, ‘</span>வாழ்<span class="s1">’, ‘</span>தாதா<span class="s1">’ </span>உள்ளிட்ட படங்களில் பணியாற்றியுள்ள பிரதீப் ஆண்டனி<span class="s1">, ‘</span>பிக்பாஸ் தமிழ்<span class="s1"> 7’ </span>நிகழ்ச்சிக்குப் பிறகு ரசிகர்களிடையே மேலும் பிரபலமானார்<span class="s1">. </span></p>
1 month ago
4 
