புதுச்சேரியில் மது விற்பனைக்கு முழு தடை : ஆளுநர் அதிரடி உத்தரவு, காரணம் என்ன?

<p>புதுச்சேரி : புதுச்சேரி சட்டப்பேரவைத் தேர்தல் 2026-ஐ முன்னிட்டு, மாநிலம் முழுவதும் அமைதியான முறையில் தேர்தலை நடத்தவும், சட்டம்-ஒழுங்கைப் பாதுகாக்கவும் மது விற்பனைக்கு முழுமையான தடை விதித்து துணைநிலை ஆளுநர் உத்தரவிட்டுள்ளார். இது தொடர்பாக வருவாய் மற்றும் பேரிடர் மேலாண்மைத் துறை வெளியிட்டுள்ள அதிகாரப்பூர்வ அரசிதழ் அறிவிப்பில் விரிவான வழிகாட்டுதல்கள் வழங்கப்பட்டுள்ளன.</p> <h2>மது விற்பனைக்கு முழுமையான தடை</h2> <p>புதுச்சேரி மாநிலத்தின் சட்டப்பேரவைத் தேர்தல் களம் சூடுபிடித்துள்ள நிலையில், தேர்தலை நேர்மையாகவும், அமைதியாகவும் நடத்துவதற்கான பாதுகாப்பு நடவடிக்கைகளை மாநில அரசு தீவிரப்படுத்தியுள்ளது. இதன் ஒரு பகுதியாக, வாக்குப்பதிவு மற்றும் வாக்கு எண்ணிக்கையை முன்னிட்டு மாநிலம் முழுவதும் உள்ள அனைத்து மதுக்கடைகளையும் மூட துணைநிலை ஆளுநர் உத்தரவிட்டுள்ளார்.</p> <p>வருவாய் மற்றும் பேரிடர் மேலாண்மைத் துறை வெளியிட்டுள்ள அரசிதழ் அறிவிப்பின்படி, பின்வரும் நாட்களில் மது விற்பனைக்கு முழுமையான தடை விதிக்கப்பட்டுள்ளது:</p> <p>வாக்குப்பதிவு காலக்கட்டம்: ஏப்ரல் 7 முதல் ஏப்ரல் 9 வரை (மொத்தம் 3 நாட்கள்). வாக்கு எண்ணிக்கை தினம்: மே 4, 2026 (1 நாள்).</p> <h2>எந்தெந்த கடைகளுக்குப் பொருந்தும்?</h2> <p>புதுச்சேரி கலால் விதிகள் 1970, விதி 199-ன் கீழ் வழங்கப்பட்டுள்ள அதிகாரத்தைப் பயன்படுத்தி இந்த உத்தரவு பிறப்பிக்கப்பட்டுள்ளது. இதன்படி, சாராய மற்றும் கள்ளுக் கடைகள், சில்லறை மதுபானக் கடைகள், பார்கள் மற்றும் உணவகங்களுடன் இணைந்த பார்கள்.</p> <p>இந்தத் தடையானது புதுச்சேரி மாநிலத்தின் நான்கு பிராந்தியங்களான புதுச்சேரி, காரைக்கால், மாஹே மற்றும் ஏனாம் ஆகிய அனைத்துப் பகுதிகளுக்கும் பொருந்தும் என அரசுச் செயலாளர் (வருவாய்) மேத்யூ பிரான்சிஸ் தெரிவித்துள்ளார்.</p> <h2>கண்காணிப்பு மற்றும் பாதுகாப்பு</h2> <p>தேர்தல் நேரத்தில் மது விநியோகம் மூலம் வாக்காளர்களைக் கவர்வதைத் தடுக்கவும், சட்டம்-ஒழுங்குப் பிரச்சினைகள் ஏற்படாமல் தவிர்க்கவும் இந்த நடவடிக்கை எடுக்கப்பட்டுள்ளது. விதிகளை மீறி மது விற்பனையில் ஈடுபடும் கடைகளின் உரிமங்கள் ரத்து செய்யப்படும் என்றும், சட்டரீதியான கடும் நடவடிக்கைகள் எடுக்கப்படும் என்றும் கலால் துறை எச்சரித்துள்ளது. வாக்குப்பதிவு ஏப்ரல் 9-ம் தேதியும், பதிவான வாக்குகள் எண்ணப்பட்டு முடிவுகள் அறிவிக்கப்படும் நாள் மே 4-ம் தேதி என்றும் தேர்தல் ஆணையம் ஏற்கனவே அறிவித்துள்ளது குறிப்பிடத்தக்கது.</p> <h2><span style="color: #fa2909;">தேர்தல் நிலவரம்</span></h2> <p>புதுச்சேரியின் 30 தொகுதிகளில் போட்டியிட மொத்தம் 442 வேட்பாளர்கள் 514 மனுக்களைத் தாக்கல் செய்திருந்தனர். இதில் நெட்டப்பாக்கம் தொகுதியில் அதிகபட்சமாக 26 மனுக்களும், ஊசுடு தொகுதியில் குறைந்தபட்சமாக 5 மனுக்களும் தாக்கல் செய்யப்பட்டன. நேற்று நள்ளிரவு வரை நீண்ட இந்த விறுவிறுப்பான பரிசீலனையில், 381 மனுக்கள் ஏற்றுக்கொள்ளப்பட்டுள்ளன. போதிய ஆவணங்கள் சமர்ப்பிக்காதது மற்றும் தொழில்நுட்பக் குளறுபடிகள் காரணமாக 103 வேட்புமனுக்கள் அதிரடியாக நிராகரிக்கப்பட்டன.</p> <p>காரைக்கால் தெற்கு தொகுதியில் உள்ள 2 மனுக்கள் மீதான முடிவு நள்ளிரவு வரை இழுபறியாக இருந்த நிலையில், ஏனாம் தொகுதியில் தாக்கல் செய்யப்பட்ட 28 மனுக்கள் இன்று (புதன்கிழமை) விரிவான ஆய்வுக்கு எடுத்துக்கொள்ளப்பட உள்ளன. மாற்று வேட்பாளர்கள் மற்றும் சுயேச்சை வேட்பாளர்களின் மனுக்கள் அதிக அளவில் தள்ளுபடி செய்யப்பட்டுள்ளதால், தேர்தல் களம் தற்போது பிரதான கட்சிகளுக்கிடையிலான நேரடிப் போட்டியாக உருவெடுத்துள்ளது. மனுக்களைத் திரும்பப் பெற அவகாசம் உள்ள நிலையில், இறுதி வேட்பாளர் பட்டியல் வெளியானதும் புதுச்சேரி தேர்தல் களம் இன்னும் சூடுபிடிக்கும் என எதிர்பார்க்கப்படுகிறது.</p>