தேர்தல் முடிந்து மக்கள் வருவார்கள் என்று தெரியாதா? ஸ்தம்பித்த நெடுஞ்சாலை! எங்கே போலீஸ்?

<p style="text-align: justify;">தமிழக சட்டமன்றத் தேர்தல் முடிந்து சென்னை திரும்பும் மக்களின் கூட்டத்தால், திருச்சி - சென்னை தேசிய நெடுஞ்சாலையில் வரலாறு காணாத போக்குவரத்து நெரிசல் ஏற்பட்டுள்ளது. குறிப்பாக சிங்கப்பெருமாள் கோவில் பகுதியில் வாகனங்கள் ஊர்ந்து சென்றதால் பொதுமக்கள் கடும் இன்னலுக்கு ஆளாகியுள்ளனர்.</p> <h3 style="text-align: justify;">தேர்தல் முடிந்து திரும்பும் மக்கள்</h3> <p style="text-align: justify;">தமிழகத்தில் கடந்த 23-ஆம் தேதி 234 தொகுதிகளிலும் சட்டமன்றத் தேர்தல் விறுவிறுப்பாக நடைபெற்றது. இதற்காகச் சென்னையிலிருந்து லட்சக்கணக்கான மக்கள் தங்களது சொந்த ஊர்களுக்குச் சென்று வாக்களித்தனர். வார இறுதி நாட்களுடன் தேர்தல் விடுமுறையும் இணைந்ததால், தென் மாவட்டங்களுக்குச் சென்ற மக்கள் அனைவரும் நேற்று மாலை முதல் மீண்டும் சென்னை நோக்கித் திரும்பத் தொடங்கினர். இன்று திங்கட்கிழமை அரசு அலுவலகங்கள், தனியார் நிறுவனங்கள் மற்றும் கல்வி நிறுவனங்கள் வழக்கம் போல் இயங்கும் என்பதால், ஒரே நேரத்தில் ஆயிரக்கணக்கான வாகனங்கள் தேசிய நெடுஞ்சாலையில் படையெடுத்தன.</p> <h3 style="text-align: justify;">3 கிலோமீட்டர்... 2 மணிநேர காத்திருப்பு!</h3> <p style="text-align: justify;">நேற்று மாலை முதலே திருச்சி - சென்னை தேசிய நெடுஞ்சாலையில் வாகன வரத்து பல மடங்கு அதிகரித்தது. அரசு விரைவுப் பேருந்துகள், தனியார் ஆம்னி பேருந்துகள் மற்றும் கார்களின் எண்ணிக்கை அதிகரிப்பால், சிங்கப்பெருமாள் கோவில் சந்திப்பில் போக்குவரத்து முற்றிலும் முடங்கியது. சுமார் 3 கிலோமீட்டர் தூரத்தைக் கடந்து செல்வதற்கு வாகன ஓட்டிகள் 2 மணி நேரத்திற்கும் மேலாக காத்திருக்க வேண்டிய அவல நிலை ஏற்பட்டது. கோடை வெயிலின் தாக்கம் மற்றும் நீண்ட நேரக் காத்திருப்பால் கைக்குழந்தைகளுடன் பயணம் செய்தவர்களும், முதியவர்களும் மிகுந்த சிரமத்திற்குள்ளாகினர்.</p> <h3 style="text-align: justify;">ஆம்புலன்ஸ் வாகனங்கள் முடக்கம்</h3> <p style="text-align: justify;">இந்த நெரிசலின் உச்சகட்டமாக, உயிருக்குப் போராடும் நோயாளிகளை ஏற்றிச் சென்ற ஆம்புலன்ஸ் வாகனங்கள் கூட சைரன் ஒலியுடன் முன்னேறிச் செல்ல முடியாமல் கார்ப்பரேட் வாகனங்களுக்கு இடையே சிக்கிக் கொண்டன. "நிமிடங்கள் மிக முக்கியம்" என்ற நிலையில், ஆம்புலன்ஸ்கள் வழி கிடைக்காமல் நின்றது அங்கிருந்தவர்களிடையே பெரும் கவலையை ஏற்படுத்தியது.</p> <h3 style="text-align: justify;">திணறும் காவல்துறை - திட்டமிடல் குறைபாடா?</h3> <p style="text-align: justify;">தொடர்ந்து வாகனங்கள் வந்துகொண்டே இருப்பதால், செங்கல்பட்டு மற்றும் சிங்கப்பெருமாள் கோவில் பகுதிகளில் பணியிலிருந்த போக்குவரத்துப் போலீசார் கூட்டத்தைச் சீர்செய்ய முடியாமல் திணறினர். "தேர்தல் முடிந்து மக்கள் திரும்புவார்கள் என்பது தெரிந்தும், போதிய போக்குவரத்துத் திட்டமிடல் இல்லாததே இந்தத் துயரத்திற்கு முக்கியக் காரணம். கூடுதல் போலீசாரை முக்கிய சந்திப்புகளில் நியமித்திருக்க வேண்டும்," என வாகன ஓட்டிகள் அதிருப்தி தெரிவித்துள்ளனர்.</p>