கோவிந்தா நாமத்தின் ரகசியம்: ஒலிக்கும் முழக்கத்தின் பின்னணியில் உள்ள ஆன்மீகக் கதை!

<p style="text-align: justify;"><strong>தஞ்சாவூர்:</strong> பெருமாள் வழிபாட்டிற்குரிய உன்னதமான திருநாமங்களில் "கோவிந்தா" என்ற சொல்லுக்குத் தனித்துவமான மகிமை உண்டு. வைணவத் திருத்தலங்களில், குறிப்பாகத் திருப்பதி ஏழுமலையான் கோவிலில் பக்தர்களின் வாயிலிருந்து எந்நேரமும் ஒலிக்கும் ஒரே மந்திரம் இந்த கோவிந்த நாமம் தான்.</p> <p style="text-align: justify;">இதுவரை இந்த நாமம் உருவானதற்கான காரணம் தெரியவில்லை என்றால், இனி அதன் முழுமையான ஆன்மீகப் பின்னணியைத் தெரிந்து கொண்டு, முழு பக்தியோடு பெருமாளை வழிபடுங்கள். இனி, கோவிந்தா கோஷத்தின் பெருமை, அதன் ஆன்மீக அர்த்தம் மற்றும் இந்த வழக்கம் எப்படி ஏற்பட்டது என்பது குறித்த விரிவான தொகுப்பைக் காண்போம்.</p> <p style="text-align: justify;"><br /><img src="https://feeds.abplive.com/onecms/images/uploaded-images/2026/06/28/03e4ce252d337d3df396fc4943339b981782632769694733_original.png" /></p> <p style="text-align: justify;"><strong>அகத்திய முனிவர் தந்த திருநாமம்: 'கோவு இந்தா' எப்படி 'கோவிந்தா' ஆனது?</strong></p> <p style="text-align: justify;">மகாலட்சுமி தன்னை விட்டுப் பிரிந்த விரக்தியில் வைகுண்டத்திலிருந்து புறப்பட்ட ஸ்ரீமந்நாராயணன், ஸ்ரீநிவாஸன் என்ற திருநாமத்துடன் திருமலையில் வாசம் செய்து வந்தார். அப்போது அங்கிருந்த அகத்திய முனிவரின் ஆசிரமக் கோசாலைக்குச் சென்று ஒரு பசுவினை தானமாகக் கேட்டார். வந்திருப்பது திருமால் என்று தெரிந்தும், "ஒரு பிரம்மச்சாரிக்கு பசுவினை தானம் செய்யக் கூடாது" என்று முனிவர் மறுத்துவிட்டார்.</p> <p style="text-align: justify;">பின்னர், பத்மாவதித் தாயாரைத் திருமணம் செய்த பிறகு, மீண்டும் பசுவைப் பெற தாயாருடன் அகத்தியர் ஆசிரமத்திற்குச் சென்றார் பெருமாள். அப்போது முனிவர் அங்கு இல்லாததால் சீடர்களால் பசுவைத் தர இயலவில்லை. இதனால் பெருமாள் அங்கிருந்து புறப்பட்டார். ஆசிரமத்திற்குத் திரும்பிய அகத்தியர் நடந்ததை அறிந்து, உலகைக் காக்கும் உத்தமனை அலைக்கழித்துவிட்டோமே என்று வருந்தினார். உடனே காமதேனு போன்ற ஒரு பசுவை எடுத்துக் கொண்டு, பெருமாள் சென்ற வழியை விசாரித்துக்கொண்டு ஓடினார்.</p> <p style="text-align: justify;">சிறிது தொலைவில் பெருமாளைப் பார்த்த அகத்தியர், "சுவாமி, கோவு இந்தா" என்று திரும்பத் திரும்பக் குரல் கொடுத்தார். தெலுங்கில் "கோவு" என்றால் பசு, "இந்தா" என்றால் எடுத்துக் கொள் என்று பொருள். பெருமாள் திரும்பிப் பார்க்காமல் நடக்க, அகத்தியரும் விடாமல் பின் தொடர்ந்து "கோவு இந்தா... கோவு இந்தா..." என அழைத்தபடியே சென்றார். அந்த வார்த்தையே மருவி "கோவிந்தா" என்ற சப்தமாக மாறியது. இறுதியில் சோதனையை முடிவுக்குக் கொண்டு வந்த பெருமாள், அகத்தியரை ஆசுவாசப்படுத்தி பசுவை ஏற்றுக்கொண்டார்.&nbsp;</p> <p style="text-align: justify;">மேலும், கலியுகத்தில் தன்னை அழைக்க உகந்த நாமம் "கோவிந்தா" என்றும், அந்த நாமத்தைச் சொல்பவர்களுக்குத் தன் அனுக்கிரகம் உடனே கிடைக்கும் என்றும் அருளினார்.</p> <p style="text-align: justify;"><strong>ஆன்மீக ரீதியாக 'கோவிந்தா' என்பதன் பொருள் என்ன?</strong></p> <p style="text-align: justify;">கிருஷ்ணாவதாரத்திலும் இந்த திருநாமத்திற்கு மிக முக்கியப் பங்கு உண்டு. கோகுலத்தில் கிருஷ்ணர் பசுக்களை மேய்த்து, அவற்றைப்பராமரித்து வந்தார். ஆன்மீக ரீதியாக, "கோ" என்றால் "பசு" (மற்றும் பூமி, ஆன்மாக்கள்) என்றும், "விந்தன்" என்றால் "காப்பவன்" என்றும் பொருள். அவ்வகையில் பசுக்களையும், உலகத்து உயிர்களையும் காப்பவன் என்ற பொருளில் "கோவிந்தன்" என்ற திருநாமம் உருவானது. கிருஷ்ணாவதாரத்தில் பகவானுக்கு "கோவிந்த பட்டாபிஷேகம்" நடைபெற்றதாக ஸ்ரீமத் பாகவதம் கூறுகிறது.</p> <p style="text-align: justify;"><strong>திருப்பதி சுப்ரபாதத்தில் கோவிந்த நாமம்</strong></p> <p style="text-align: justify;">திருமலையில் தினமும் அதிகாலையில் விஸ்வரூப தரிசனத்தின் போது பாடப்படும் சுப்ரபாத சேவையில், "உத்திஷ்டோத்திஷ்ட கோவிந்த உத்திஷ்ட கருணாகர" என்ற வரிகள் இடம்பெறுகின்றன. இதன் பொருள், "கோவிந்தா! நீ விழித்தால் இந்த உலகமே விழிக்கும்! கருணைக் கடலே, தூக்கத்திலிருந்து திருக்கண் மலர்ந்து எங்களுக்கு அருள்புரிவாய்!" என்பதாகும்.</p> <p style="text-align: justify;"><strong>'கோவிந்தா கொள்ளி போடுதல்' &ndash; இதன் பின்னணியில் உள்ள ஆன்மீகம்</strong></p> <p style="text-align: justify;">உலகில் அநாதையாக இறப்பவர்களுக்கும் அந்த எம்பெருமானே துணையாக இருக்கிறான் என்பதை உணர்த்துவதற்காகவே, ஆதரவற்ற உடல்களுக்குச் செய்யப்படும் இறுதிச் சடங்குகளை "கோவிந்தா கொள்ளி போடுதல்" என்று அழைக்கும் வழக்கம் ஏற்பட்டது.</p> <p style="text-align: justify;">காஞ்சி மஹா பெரியவர் தன்னுடைய அருளாசி உரைகளில், "அநாதை பிரேத சம்ஸ்காரம் (ஆதரவற்ற உடல்களுக்கு இறுதிச் சடங்கு செய்தல்) செய்தால், ஒரு அசுவமேத யாகம் செய்ததற்கான மகா புண்ணியம் கிடைக்கும்" என்று குறிப்பிட்டுள்ளார். பந்தபாசங்கள் அற்ற நிலையிலும் ஜீவன்களைக் காப்பவன் கோவிந்தனே என்பதை இது உணர்த்துகிறது.</p>