<p style="text-align: left;"><strong>கள்ளக்குறிச்சி:</strong> கள்ளக்குறிச்சி மாவட்டத்தில் தனியார் துறை வேலை வாய்ப்பில் சாதனை – 2.49 லட்சம் பேருக்கு பணி நியமன ஆணை வழங்கப்பட்டுள்ளதாக மாவட்ட ஆட்சியர் பிரசாந்த் தெரிவித்துள்ளார்.</p>
<p style="text-align: left;">கள்ளக்குறிச்சி மாவட்டத்தில் கடந்த 4 ஆண்டுகளில் நடைபெற்ற வேலை வாய்ப்பு முகாம்களில், 2 லட்சத்து 49 ஆயிரத்து 392 இளைஞர்கள் மற்றும் இளம்பெண்களுக்கு தனியார் நிறுவனங்களில் பணியிட நியமன ஆணைகள் வழங்கப்பட்டுள்ளன என்று மாவட்ட கலெக்டர் பிரசாந்த் தெரிவித்துள்ளார். </p>
<h2 style="text-align: left;">வேலை வாய்ப்பு முகாம்கள் மூலம் பெரும் பலன்</h2>
<p style="text-align: left;">வேலை வாய்ப்பு மற்றும் பயிற்சி துறை சார்பில் கடந்த 4 ஆண்டுகளில் மாவட்டம் முழுவதும் 2,049 தனியார் துறை வேலை வாய்ப்பு முகாம்கள் நடத்தப்பட்டுள்ளன. இதில் மொத்தமாக 60,057 தனியார் நிறுவனங்கள் பங்கேற்றுள்ளன. அந்த முகாம்களில் 13 லட்சத்து 57 ஆயிரத்து 99 பேர் கலந்து கொண்டுள்ளனர். இவர்களுள் திறமையும் தகுதியும் நிரூபித்த 2 லட்சத்து 49 ஆயிரத்து 392 பேருக்கு பணி நியமன ஆணைகள் வழங்கப்பட்டுள்ளன என கலெக்டர் தெரிவித்துள்ளார். </p>
<h2 style="text-align: left;">இளையோருக்கான அரசு திட்டங்கள் </h2>
<p style="text-align: left;">கலெக்டர் பிரசாந்த் வெளியிட்ட செய்திக்குறிப்பில் கூறியதாவது: </p>
<p style="text-align: left;">மாவட்டத்தில் வேலை வாய்ப்பு மற்றும் பயிற்சி துறையின் கீழ் தொழில்முறை மற்றும் நிர்வாக வேலை வாய்ப்பு, தொழில் நுட்ப ஆலோசனை, சிறப்பு பயிற்சி, உதவித் தொகை, தனியார் துறை வேலை வாய்ப்பு உள்ளிட்ட பல்வேறு திட்டங்கள் மேற்கொள்ளப்பட்டு வருகின்றன. </p>
<p style="text-align: left;">உதவித் தொகையைப் பெற விரும்புவோர் வேலை வாய்ப்பு அலுவலகத்தில் பதிவு செய்து 5 ஆண்டுகள் முடிவடைந்திருக்க வேண்டும். பதிவு புதுப்பித்து இருக்காதவர்களுக்கு உதவித் தொகை கிடையாது என்று கலெக்டர் எச்சரித்துள்ளார். </p>
<h2 style="text-align: left;">மெய்நிகர் கற்றல் வலைதளம் – தகவல் பரவல்</h2>
<p style="text-align: left;">வேலை வாய்ப்பு துறையின் மெய்நிகர் கற்றல் (Virtual Learning) வலைதளம் மூலம் 730 வகை தரவுகள் பதிவேற்றம் செய்யப்பட்டுள்ளன. இதை மொத்தம் 42 லட்சத்து 72 ஆயிரத்து 898 பதிவிறக்கங்கள் செய்துள்ளதுடன், 3 லட்சத்து 96 ஆயிரத்து 732 பேர் பதிவு செய்து பயன் பெற்றுள்ளனர். மேலும், 97 லட்சத்து 53 ஆயிரத்து 466 பார்வையாளர்கள் அந்த வலைதளத்தை பார்வையிட்டுள்ளனர் என்பது குறிப்பிடத்தக்கது. </p>
<h2 style="text-align: left;">அரசு பணிகளுக்கான இலவச பயிற்சி</h2>
<p style="text-align: left;">தன்னார்வ பயிலும் வட்டத்தின் சார்பில் அரசு பணிகளில் சேர விரும்பும் இளைஞர்களுக்காக 1,657 இலவச பயிற்சி வகுப்புகள் நடத்தப்பட்டு, அதில் 81 ஆயிரத்து 352 பேர் பயிற்சி பெற்றுள்ளனர். அவர்களுள் 6 ஆயிரத்து 618 பேர் தேர்ச்சி பெற்று அரசு பணிகளில் இணைந்துள்ளனர். </p>
<h2 style="text-align: left;">பள்ளிகள் மற்றும் கல்லூரிகளில் தொழில்நெறி வழிகாட்டல் </h2>
<p style="text-align: left;">மாணவர்கள் அரசும், தனியாரும் வழங்கும் வேலை வாய்ப்புகளைப் பற்றிய விழிப்புணர்வை பெறும் வகையில் மாவட்டம் முழுவதும் 2,494 பள்ளிகள், 466 தொழில் பயிற்சி நிலையங்கள், 204 தொழில்நுட்ப கல்லூரிகள் மற்றும் 3,122 கல்லூரிகளில் தொழில்நெறி வழிகாட்டும் நிகழ்ச்சிகள் நடத்தப்பட்டுள்ளன. இதன் மூலம் மொத்தம் 8 லட்சத்து 95 ஆயிரத்து 269 மாணவர்கள் பயனடைந்துள்ளனர். </p>
<p style="text-align: left;">இளைஞர்களுக்கான கலெக்டரின் ஆலோசனை மாவட்ட கலெக்டர் பிரசாந்த் மேலும் கூறியதாவது: </p>
<p style="text-align: left;">“இளைஞர்கள் தங்களது எதிர்காலத்தை வளர்த்துக்கொள்ள வேலை வாய்ப்பு மற்றும் பயிற்சி துறையின் சார்பில் நடைபெறும் அனைத்து திட்டங்களையும், அரசு போட்டித் தேர்வுகளுக்கான இலவச பயிற்சிகளையும் முழுமையாக பயன்படுத்தி கொள்ள வேண்டும். அரசு மற்றும் தனியார் துறை வேலை வாய்ப்பு முகாம்களில் அக்கறையுடன் பங்கேற்று தங்கள் திறமைகளை வெளிப்படுத்தும் போது, சிறந்த பணியிடங்களைப் பெறுவது எளிதாகும்,” என்றார்.</p>
2 months ago
4 
