எமனை சம்ஹாரம் செய்த திருக்கடையூரில் கண்கொள்ளாக் காட்சியாக நடந்த திருத்தேரோட்டம்...!

<p style="text-align: justify;"><strong>திருக்கடையூர்: </strong>மயிலாடுதுறை மாவட்டம், தரங்கம்பாடி தாலுக்காவிற்கு உட்பட்ட திருக்கடையூரில் அமைந்துள்ள, உலகப் புகழ்பெற்ற ஸ்ரீ அபிராமி சமேத ஸ்ரீ அமிர்தகடேஸ்வரர் கோவிலின் சித்திரை மாத பிரம்மோற்சவ விழாவின் முக்கிய நிகழ்வான திருத்தேரோட்டம் இன்று காலை மிகச் சிறப்பாக நடைபெற்றது. இதில் ஏராளமான பக்தர்கள் "பக்தி" முழக்கமிட்டு வடம் பிடித்துத் தேரினை இழுத்தனர்.</p> <h3 style="text-align: justify;">தல வரலாறு மற்றும் சிறப்புகள்</h3> <p style="text-align: justify;">தருமபுரம் ஆதீனத்திற்குச் சொந்தமான இக்கோவில், தேவாரப் பாடல் பெற்ற காவிரி தென்கரைத் தலங்களில் ஒன்றாகும். சிவபெருமான், காலசம்ஹார மூர்த்தியாக எழுந்தருளி, தனது பக்தன் மார்க்கண்டேயனுக்காக எமனை சம்ஹாரம் செய்த தலம் இது என்பதால், இது அட்ட வீரட்டத் தலங்களில் ஒன்றாகத் திகழ்கிறது. ஆயுள் விருத்திக்காக சஷ்டியப்த பூர்த்தி, பீமரத சாந்தி மற்றும் சதாபிஷேக பூஜைகள் செய்வதற்கு உலகெங்கிலும் இருந்து பக்தர்கள் இத்தலத்திற்கு வருவது வழக்கம்.</p> <h3 style="text-align: justify;">கொடியேற்றத்துடன் தொடங்கிய பிரம்மோற்சவம்</h3> <p style="text-align: justify;">இக்கோவிலின் இந்த ஆண்டிற்கான சித்திரை மாத பிரம்மோற்சவ விழா கடந்த ஏப்ரல் 21-ஆம் தேதி அன்று திருக்கடையூர் தருமபுரம் கட்டளை சிவகுருநாதன் தம்பிரான் சுவாமிகள் முன்னிலையில், வேத மந்திரங்கள் முழங்க பஞ்சமுக கொடியேற்றத்துடன் வெகு விமர்சையாகத் தொடங்கியது. விழாவின் ஒவ்வொரு நாளும் சுவாமிக்கும் அம்பாளுக்கும் பல்வேறு வாகனங்களில் வீதியுலா மற்றும் சிறப்புப் பூஜைகள் நடைபெற்று வந்தன.</p> <h3 style="text-align: justify;">திருத்தேரோட்டம்: அலங்காரக் கோலத்தில் பஞ்சமூர்த்திகள்</h3> <p style="text-align: justify;">விழாவின் எட்டாம் திருநாளான இன்று, சிகர நிகழ்ச்சியான திருத்தேரோட்டம் நடைபெற்றது. இதனை முன்னிட்டு அதிகாலை முதலே மூலவர் மற்றும் உற்சவ மூர்த்திகளுக்குச் சிறப்பு அபிஷேக ஆராதனைகள் நடைபெற்றன. பின்னர், அபிராமி சமேத அமிர்தகடேஸ்வரர் மற்றும் விநாயகர், சுப்பிரமணியர், சண்டிகேஸ்வரர் உள்ளிட்ட பஞ்ச மூர்த்திகளும் சிறப்பு மலர் அலங்காரத்தில் திருத்தேரில் எழுந்தருளினர். தேரில் எழுந்தருளிய சுவாமிக்கு மகா தீபாராதனை காட்டப்பட்டது. அப்போது அங்கு கூடியிருந்த திரளான பக்தர்கள் பக்திப் பரவசத்தில் முழக்கமிட்டனர்.</p> <h3 style="text-align: justify;">முக்கியப் பிரமுகர்கள் பங்கேற்பு</h3> <p style="text-align: justify;">சரியாக காலை சுப முகூர்த்தத்தில் தேரோட்டம் தொடங்கியது. இதில் தருமபுரம் கட்டளை ஸ்ரீமத் சிவகுருநாதன் தம்பிரான் சுவாமிகள் தேரினைத் தொடங்கி வைத்தார். மேலும், பூம்புகார் சட்டமன்ற உறுப்பினர் நிவேதா முருகன், முன்னாள் எம்.எல்.ஏ மற்றும் அதிமுக வேட்பாளர் பவுன்ராஜ், உள்ளாட்சிப் பிரதிநிதிகள் மற்றும் ஊர் முக்கியப் பிரமுகர்கள் முன்னிலை வகித்து தேரினை வடம் பிடித்து இழுத்தனர்.</p> <p style="text-align: justify;">தேரானது நான்கு ரத வீதிகளிலும் அசைந்தாடி வரும் காட்சி காணக் கண்கொள்ளாக் காட்சியாக அமைந்தது. பக்தர்கள் தங்களின் வீடுகளின் முன்னால் தேருக்குத் தேங்காய் உடைத்துக் கற்பூர ஆரத்தி எடுத்து வழிபட்டனர்.</p> <h3 style="text-align: justify;">பக்தர்களுக்கு நீர்மோர், தர்பூசணி விநியோகம்</h3> <p style="text-align: justify;">தற்போது கோடை காலம் என்பதால் வெயிலின் தாக்கம் கடுமையாக இருந்தது. இதனைப் பொருட்படுத்தாது தேரினை வடம் பிடித்து இழுத்த ஆயிரக்கணக்கான பக்தர்களின் தாகத்தைத் தீர்க்கும் வகையில், அபிராமி பொதுநல சங்கம் சார்பாகப் பல்வேறு இடங்களில் நீர்மோர், குளிர் பானங்கள் மற்றும் தர்பூசணி ஆகியவை வழங்கப்பட்டன. இது பக்தர்களிடையே பெரும் வரவேற்பைப் பெற்றது.</p> <h3 style="text-align: justify;">பாதுகாப்பு ஏற்பாடுகள்</h3> <p style="text-align: justify;">தேரோட்டத்தை முன்னிட்டு மயிலாடுதுறை மாவட்டக் காவல்துறையினர் பலத்த பாதுகாப்பு ஏற்பாடுகளைச் செய்திருந்தனர். நான்கு ரத வீதிகளிலும் மக்கள் கூட்டம் அலைமோதியது,&nbsp; தீயணைப்புத் துறையினர் மற்றும் மருத்துவக் குழுவினரும் அவசரத் தேவைக்காகத் தயார் நிலையில் வைக்கப்பட்டிருந்தனர். இதற்கான ஏற்பாடுகளைத் தருமபுரம் ஆதீனம் மற்றும் கோவில் நிர்வாகத்தினர் சிறப்பாகச் செய்திருந்தனர்.</p>