<p style="text-align: justify;">தஞ்சாவூர்: தஞ்சாவூர் மாவட்டம் மேலஉளூர் மற்றும் அதனைச் சுற்றியுள்ள கிராமப் பகுதிகளில், தமிழகத்தின் பாரம்பரியமிக்க உம்பளச்சேரி இன நாட்டு மாடுகள் ஆயிரக்கணக்கில் திரண்டு வந்து விளைநிலங்களில் மேய்ச்சலில் ஈடுபடும் கண்கொள்ளாக் காட்சி பொதுமக்களைப் பெரிதும் கவர்ந்து வருகிறது.</p>
<p style="text-align: justify;"><strong>அறுவடைக்கு பின் மேய்ச்சல்</strong></p>
<p style="text-align: justify;">டெல்டா மாவட்டங்களின் விவசாயப் பாரம்பரியத்தோடு பின்னிப்பிணைந்தது கால்நடை வளர்ப்பு. தற்போது மேலஉளூர் சுற்றுவட்டாரப் பகுதிகளில் விவசாயப் பணிகள் மற்றும் கோடைக்கால அறுவடைகள் நிறைவடைந்த நிலையில், பரந்து விரிந்து காணப்படும் தரிசு நிலங்கள் மற்றும் உளுந்து, பயறு அறுவடை செய்யப்பட்ட வயல்களில் இந்த நாட்டு மாடுகள் கூட்டமாக மேய்ச்சலுக்கு விடப்பட்டுள்ளன.</p>
<p style="text-align: justify;"><strong>சேற்று நிலங்களின் நாயகன் - உம்பளச்சேரி மாடுகள்:</strong></p>
<p style="text-align: justify;">டெல்டா மாவட்டங்களின் களிமண் மற்றும் ஈரநிலங்களுக்கு ஏற்ற, நோய் எதிர்ப்புச் சக்தி அதிகம் கொண்ட உம்பளச்சேரி இன மாடுகள் இன்றும் விவசாயிகளால் போற்றி வளர்க்கப்பட்டு வருகின்றன. உம்பளச்சேரி மாடுகளுக்கே உரித்தான தனித்துவமான சாம்பல் மற்றும் வெள்ளை நிற அமைப்போடு ஆயிரக்கணக்கான மாடுகள் ஒரே இடத்தில் அணிவகுத்து மேய்வது, காண்போரை கிராமிய மணத்திற்கு அழைத்துச் செல்லும் வகையில் அமைந்துள்ளது.</p>
<p style="text-align: justify;"><strong>இயற்கை உரமாகும் வயல்வெளிகள்</strong></p>
<p style="text-align: justify;">இதுகுறித்து உள்ளூர் விவசாயிகள் கூறுகையில், "இப்படி ஆயிரக்கணக்கான நாட்டு மாடுகள் எங்கள் வயல்களில் வந்து தங்கி மேய்வதால், அவற்றின் சாணம் மற்றும் சிறுநீர் மூலம் நிலத்திற்குத் தேவையான தழைச்சத்து மற்றும் மண்புழுக்கள் பெருகுகின்றன. இது அடுத்த போக சாகுபடிக்கு மண்ணின் வளத்தை எந்தவித இரசாயனமும் இன்றி இயற்கை முறையிலேயே மேம்படுத்த பெரிதும் உதவுகிறது" என்றனர்.</p>
<p style="text-align: justify;"><strong>உம்பளச்சேரி மாடுகளின் அளப்பரிய பயன்கள்</strong></p>
<p style="text-align: justify;">மருத்துவக் குணம் கொண்ட ஏ2) பால்: உம்பளச்சேரி மாடுகளின் பால் எளிதில் செரிமானமாகக்கூடிய ஏ2 புரதச்சத்து கொண்டது. இது நோய் எதிர்ப்புச் சக்தியை அதிகரிப்பதுடன், குழந்தைகளுக்கு உகந்த ஊட்டச்சத்து மிக்க பாலாகக் கருதப்படுகிறது. இதன் பாலில் இருந்து எடுக்கப்படும் நெய் மற்றும் வெண்ணெய் மருத்துவக் குணம் வாய்ந்தவை.</p>
<p style="text-align: justify;"><strong>இயற்கை விவசாயத்தின் அச்சாணி:</strong> ஜீவாமிர்தம், பஞ்சகவ்யம், மூலிகைப் பூச்சி விரட்டி போன்ற இயற்கை விவசாய இடுபொருட்கள் தயாரிப்பதற்கு உம்பளச்சேரி மாடுகளின் சாணமும், கோமியமும் மிக முக்கிய ஆதாரமாக விளங்குகின்றன. இவற்றில் நுண்ணுயிரிகளின் பெருக்கம் மிக அதிகமாக இருக்கும்.</p>
<p style="text-align: justify;"><strong>அசாத்திய உழைப்புத் திறன்:</strong> டெல்டா பகுதியின் ஆழமான களிமண் சேற்றில் மற்ற மாடுகளால் எளிதாக நடக்க முடியாது. ஆனால், உம்பளச்சேரி மாடுகளின் கெட்டியான குளம்புகள் (கால்கள்) சேற்றில் சிக்காமல் அசாத்தியமாக உழவு செய்ய உதவும் திறன் கொண்டவை. பாரம் தூக்குவதிலும் இவை சளைத்தவை அல்ல.</p>
<p style="text-align: justify;"><strong>குறைந்த பராமரிப்பு, அதிக லாபம்:</strong> இந்த நாட்டு மாடுகளுக்கு விலையுயர்ந்த அடர்தீவனங்கள் தேவையில்லை. வயல்வெளிகளில் கிடைக்கும் வைக்கோல், தவிடு மற்றும் இயற்கை புற்களைக் கொண்டே ஆரோக்கியமாக வளரக்கூடியவை. இதனால் விவசாயிகளுக்குப் பராமரிப்புச் செலவு மிகக் குறைவு.</p>
<p style="text-align: justify;">நவீன இயந்திரமயமாக்கல் மற்றும் டிராக்டர்களின் வரவுக்கு மத்தியிலும், மேலஉளூர் பகுதியில் இன்னும் அழியாமல் தொடரும் இந்த பாரம்பரிய உம்பளச்சேரி கால்நடை மேய்ச்சல் முறை, டெல்டா மண்ணின் விவசாயக் கலாச்சாரத்தையும், கால்நடைச் செல்வத்தின் மகத்துவத்தையும் பறைசாற்றுவதாக அமைந்துள்ளது.</p>
4 months ago
9 
