<p>ஆண்டுதோறும் 1000 ரூபாய் என்ற அளவில் 3 ஆண்டுகளுக்கு கல்வி உதவித் தொகை அளிக்க நடத்தப்படும் ஊரகத் திறனாய்வுத் தேர்வுக்கு (ட்ரஸ்ட்) விண்ணப்பப் பதிவு தொடங்கி உள்ளது. மாணவர்கள் இந்தத் தேர்வுக்கு நவம்பர் 20ஆம் தேதி வரை விண்ணப்பிக்கலாம்.</p>
<h2><strong>ஊரகத்‌ திறனாய்வுத்‌ தேர்வு (TRUST Exam), டிசம்பர்‌ 2024</strong></h2>
<p>தமிழ்நாடு ஊரகப்‌ பகுதி மாணவர்களுக்கான திறனாய்வுத்‌ தேர்விற்கு விண்ணப்பிப்பதற்கான அறிவுரைகளை அரசுத்‌ தேர்வுகள்‌ இயக்ககம்‌ வழங்கி உள்ளது. </p>
<p>அதன்படி, 2024- 2025ஆம்‌ கல்வியாண்டில்‌ அரசு அங்கீகாரம்‌ பெற்ற பள்ளிகளில்‌ பயிலும்‌ ஒன்பதாம்‌ வகுப்பு மாணவ / மாணவியர்கள்‌ 2024 டிசம்பர்‌ மாதம்‌ 14-ஆம்‌ தேதி ( சனிக்கிழமை ) நடைபெறவுள்ள ஊரகத்‌ திறனாய்வுத்‌ தேர்விற்கு (TRUST) விண்ணப்பிக்கலாம்‌ என அறிவிக்கப்படுகிறது.</p>
<p> 9ஆம் வகுப்பு படிக்கும் மாணவர்கள் ஆண்டுதோறும் ₹1,000 உதவித்தொகை பெற, நவ.20ம் தேதிக்குள்ளாக தலைமை ஆசிரியர்கள் மூலம் விண்ணப்பிக்கலாம். மாவட்டம் தோறும் தேர்ந்தெடுக்கப்படும் 100 மாணவ மாணவியருக்கு 9ஆம் வகுப்பு முதல் 12ஆம் வகுப்பு வரை இத்தொகை வழங்கப்படும். </p>
<h2><strong>யாரெல்லாம் விண்ணப்பிக்கலாம்?</strong></h2>
<p>ஊரகப்‌ பகுதிகளில்‌ (அதாவது கிராமப்புற பஞ்சாயத்து, நகர பஞ்சாயத்து மறறும்‌ டவுன்சிப்‌), அரசு அங்கீகாரம்‌ பெற்ற பள்ளிகளில்‌ 2024 -2025 கல்வியாண்டில்‌ 9 - ஆம்‌ வகுப்பு பயிலும்‌ மாணவ மாணவியர்‌ இந்தத் திறனாய்வுத்‌ தேர்வு எழுதுவதற்கு தகுதி உடையவர்கள் ஆவார்கள்‌.</p>
<h2><strong>வருமானச் சான்று முக்கியம்</strong></h2>
<p>தேர்விற்கு விண்ணப்பிக்கும்‌ தேர்வரின்‌ பெற்றோர்‌ / பாதுகாவலரின்‌ ஆண்டு வருமானம்‌ ரூ.1,00,000/-- மிகாமல்‌ உள்ளது என்பதற்கு வருவாய்‌ துறையினரிடம் இருந்து வருமான சான்று பெற்று அளித்தல்‌ வேண்டும்‌.</p>
<h2><strong> விண்ணப்பிப்பது எப்படி?</strong></h2>
<p> தேர்விற்கு விண்ணப்பிக்கும்‌ மாணவ, மாணவியர்‌ www.dge.tn.gov.in என்ற இணைய தளத்தில்‌ விண்ணப்பத்தினை பதிவிறக்கம்‌ செய்து, தேர்வுக்கான கட்டணம்‌ ரூ.5/- சேவைக்‌ கட்டணம்‌ ரூ.5/- என மொத்தமாக ரூ.10/-னை பூர்த்தி செய்யப்பட்ட விண்ணப்பத்துடன்‌ பணமாக பள்ளி தலைமையாசிரியரிடம்‌ ஒப்படைக்க வேண்டும்‌.</p>
<p><a href="https://tnegadge.s3.amazonaws.com/notification/TRUST/1731330681.pdf">https://tnegadge.s3.amazonaws.com/notification/TRUST/1731330681.pdf </a> என்ற இணைப்பை க்ளிக் செய்து, விண்ணப்பத்தினை பதிவிறக்கம்‌ செய்துகொள்ளலாம். </p>
<h2><strong>நவம்பர் 20 கடைசி</strong></h2>
<p>தேர்விற்கு விண்ணப்பிக்க 12.11.2024 முதல்‌ 20.11.2024 வரை என கால நிர்ணயம்‌ செய்யப்பட்டுள்ளது. இதற்குப்‌ பின்னர் பெறப்படும்‌ விண்ணப்பங்கள்‌ நிராகரிக்கப்படும்‌.</p>
<p>ஒவ்வொரு வருவாய்‌ மாவட்டத்திலும்‌ தோந்தெடுக்கப்படும்‌ 100 மாணவர்களுக்கு (50 மாணவியர்‌ + 50 மாணவர்கள்) 9 ஆம்‌ வகுப்பு முதல்‌ 12 ஆம்‌ வகுப்பு வரை தொடர்ந்து படிக்கும்‌ காலத்திற்கு படிப்புதவித்‌ தொகை ஆண்டுதோறும்‌ ரூ.1000/ வீதம்‌ வழங்கப்படும்‌.</p>
<h2><strong> யாரெல்லாம் விண்ணப்பிக்க முடியாது?</strong></h2>
<p> அதே நேரத்தில் நகராட்சி மற்றும்‌ மாநகராட்சி பகுதிகளில்‌ படிக்கும்‌ மாணவ / மாணவிகள்‌ விண்ணப்பிக்க இயலாது என்று அரசுத் தேர்வுகள் இயக்ககம் தெரிவித்துள்ளது.</p>
1 year ago
7 
