TRB Annual Planner 2025: அரசு துறைகளில் 7535 பணியிடங்கள்; என்னென்ன தேர்வு? எப்போது? டிஆர்பி அசத்தல் அறிவிப்பு

<p>2025ஆம் ஆண்டில் 7,535 இடங்களை நிரப்புவதற்கான உத்தேச ஆண்டு அட்டவணையை ஆசிரியர்கள் தேர்வு வாரியம் வெளியிட்டுள்ளது.</p> <h2><strong>என்னென்ன தேர்வு? என்ன பணியிடங்கள்?</strong></h2> <p>அண்ணா பல்கலைக்கழகத்தின்கீழ் இணை பேராசிரியர், உதவி நூலகர், உதவி இயக்குநர் உள்ளிட்ட பணியிடங்களுக்கான தேர்வு ஏப்ரல் மாதம் நடைபெற உள்ளது. இந்தத் தேர்வின் மூலம் 232 பணி இடங்கள் நிரப்பப்பட உள்ளன.</p> <p>சட்ட உதவி பேராசிரியர், சட்ட இணை பேராசிரியர் பணியிடங்களுக்கான தேர்வுகள் மே மாதம் நடைபெற உள்ளன. இந்தத் தேர்வின் மூலம் 132 பணி இடங்கள் நிரப்பப்பட உள்ளன.</p> <h2><strong> 4000 பணி இடங்களுக்கான தேர்வு</strong></h2> <p>மேலும் ஏற்கெனவே அறிவிக்கப்பட்ட 4000 பணி இடங்களுக்கான தேர்வு ஜூலை மாதம் நடைபெற உள்ளது. இந்தத் தேர்வின் மூலம் கலை, அறிவியல் கல்லூரிகளில் உதவிப் பேராசிரியர் பணி இடங்கள் நிரப்பப்பட உள்ளன.</p> <p>அதேபோல, சிஎம்ஆர்எஃப் (CMRF) எனப்படும் முதலமைச்சருக்கான&nbsp;ஆய்வு உதவித்தொகைக்கான தேர்வு குறித்த அறிவிக்கை, ஜூன் மாதம் வெளியிடப்பட உள்ளது. இதன்மூலம் 180 மாணவர்கள் தேர்வு செய்யப்பட உள்ளனர். இவர்களுக்கான தேர்வு செப்டம்பர் மாதம் நடைபெற உள்ளது.</p> <h2><strong>முதுகலை உதவியாளர் இடங்கள்</strong></h2> <p>தொடர்ந்து 1915 முதுகலை உதவியாளர் (Post Graduate Assistants) இடங்கள் நிரப்பப்பட உள்ளன. இதற்கான அறிவிக்கை ஆகஸ்ட் மாதம் வெளியாகும் நிலையில், நவம்பர் மாதத்தில் தேர்வு நடைபெற உள்ளது.</p> <p>பி.டி. அசிஸ்டெண்ட்ஸ் மற்றும் பிஆர்டிஇ ஆசிரியர்களுக்கான 1205 பணி இடங்களுக்கான தேர்வுகள் நவம்பர் மாதம் நடைபெற உள்ளன. அதேபோல வட்டாரக் கல்வி அலுவலருக்கான பணியிடங்கள் 51 ஆக அறிவிக்கப்பட்டு உள்ளன. 2026ஆம் ஆண்டு மார்ச் மாதத்தில் இந்தத் தேர்வு நடைபெற உள்ளது.</p> <p>ஒவ்வோர் ஆண்டுக்கும் ஆண்டின் ஆரம்பத்திலேயே, அந்த ஆண்டில் நிரப்பப்படும் பணி இடங்கள், நடத்தப்படும் தேர்வுகள் ஆகியவற்றின் அட்டவணை வெளியிடப்படும்.</p> <h2><strong>ஆசிரியர் தகுதித் தேர்வு எப்போது?</strong></h2> <p>எனினும் ஆசிரியர் தகுதித் தேர்வு எப்போது நடைபெறும், இடைநிலை ஆசிரியர் பணியிடங்கள் எவ்வளவு என்பது குறித்த விவரங்கள் இந்த அட்டவணையில் வெளியாகவில்லை.</p> <p>இந்த நிலையில், 2025ஆம் ஆண்டுக்கான ஆண்டு தேர்வு அட்டவணையை ஆசிரியர்கள் தேர்வு வாரியம் வெளியிடாமல் இருந்தது. 3 மாதங்கள் முடிய இருந்த நிலையில், அதுகுறித்து தேர்வர்கள் அதிருப்தி தெரிவித்து வந்தனர். இந்த நிலையில், தேர்வு அட்டவணையை டிஆர்பி வெளியிட்டுள்ளது.</p>