<p style="text-align: justify;">2024 ஆம் ஆண்டின் மக்களவை தேர்தல் முடிவுகள் வெளியாகி வரும் நிலையில் தூத்துக்குடி தொகுதி நிலவரம் பற்றி காணலாம். </p>
<p style="text-align: justify;">இந்தியாவில் தேர்தல் திருவிழாவின் இன்றுடன் நிறைவடைகிறது. கடந்த ஏப்ரல் 19 ஆம் தேதி முதல் ஜூன் 1ஆம் தேதி வரை 7 கட்டங்களாக தேர்தல் நடைபெற்ற நிலையில் இன்று (ஜூன் 4) வாக்குகள் எண்ணப்படுகிறது. தமிழ்நாட்டில் திமுக, பாஜக, அதிமுக, நாம் தமிழர் கட்சி என நான்கு முனை போட்டி நிலவுகிறது. </p>
<h2 style="text-align: justify;"><strong>தூத்துக்குடி மக்களவை தொகுதி</strong> </h2>
<p style="text-align: justify;">தென்மாவட்டத்தின் மிக முக்கிய ஊரான தூத்துக்குடி, சென்னைக்கு அடுத்து 4 வகையான போக்குவரத்தையும் தன்னகத்தே கொண்டது. பல சுதந்திர போராட்ட வீரர்களை கொண்ட இந்த தூத்துக்குடியில் மக்களவை தொகுதி 2009-ம் ஆண்டு தொகுதி மறுசீரமைப்புக்குப் பிறகு தான் உருவாக்கப்பட்டது. அதற்கு முன்பாக திருச்செந்தூர் தொகுதியாக இருந்தது. </p>
<p style="text-align: justify;">இந்த தொகுதியானது ஸ்ரீவைகுண்டம், திருச்செந்தூர், தூத்துக்குடி, கோவில்பட்டி, ஒட்டபிடாரம், விளாத்திகுளம் ஆகிய 6 தொகுதிகளை உள்ளடக்கியது. இதில் ஒட்டப்பிடாரம் தனித் தொகுதியாகும். </p>
<h2 style="text-align: justify;"><strong>வாக்களித்தவர்கள் நிலவரம்</strong></h2>
<p style="text-align: justify;">தூத்துக்குடி தொகுதியில் 7,13,388 ஆண் வாக்காளர்களும், 7,44,826 பெண் வாக்காளர்களும், 216 மூன்றாம் பாலின வாக்காளர்களும் உள்ளனர். இவர்களில் 4,72,056 ஆண் வாக்காளர்களும், 5,03,325 பெண் வாக்களர்களும், 87 மூன்றாம் பாலினத்தவர்களும் தங்கள் வாக்கினை செலுத்தி ஜனநாயக கடமையாற்றினர். மொத்த வாக்கு எண்ணிக்கை சதவிகிதம் 66.88 என தேர்தல் ஆணையம் தெரிவித்துள்ளது. </p>
<h2 style="text-align: justify;"><strong>தொகுதியின் முக்கிய வேட்பாளர்கள்</strong></h2>
<p style="text-align: justify;">3 மக்களவை தேர்தலை இதுவரை சந்தித்துள்ள தூத்துக்குடி மக்களவை தொகுதியில் திமுக 2 முறையும், அதிமுக ஒரு முறையும் வெற்றி பெற்றது. இதில் 2019 ஆம் ஆண்டு தேர்தலில் திமுக சார்பில் கனிமொழியும், அதிமுக கூட்டணியில் இருந்த பாஜக சார்பில் தமிழிசை சௌந்தரராஜனும் போட்டியிட்ட நிலையில் கனிமொழி வென்றார். </p>
<p style="text-align: justify;">2024 ஆம் ஆண்டு தேர்தலில் திமுக சார்பில் கனிமொழி, அதிமுக சார்பில் சிவசாமி வேலுமணி, பாஜக கூட்டணியில் இடம்பெற்றுள்ள தமாகா சார்பில் எஸ்.டி.ஆர்.ஜெயசீலன், நாம் தமிழர் கட்சி சார்பில் ரொவினோ ரூத் ஜென் ஆகியோர் முக்கிய வேட்பாளராக களம் கண்டுள்ளனர். </p>
1 year ago
6 
