<p>உலகப் புகழ்பெற்ற QS Ranking பட்டியல் இன்று வெளியாகி உள்ளது. இதில் தொடர்ந்து 14ஆம் ஆண்டாக, மாசாசுசெட்ஸ் தொழில்நுட்ப நிறுவனம் (Massachusetts Institute of Technology - MIT) உலக அளவில் முதலிடத்தில் உள்ளது. அதேபோல இந்திய அளவில் QS Ranking பட்டியலில் ஐஐடி டெல்லி முதலிடத்தில் உள்ளது.</p>
<h2><strong>இந்தியாவின் தலை சிறந்த கல்வி நிறுவனமாக மிளிரும் ஐஐடி டெல்லி</strong></h2>
<p>இந்த பட்டியலில், கடந்த காலங்களைக் காட்டிலும் முன்னேறி ஐஐடி டெல்லி 123ஆம் இடத்தைப் பிடித்துள்ளது. 2025ஆம் ஆண்டு 150ஆம் இடத்திலும் 2024ஆம் ஆண்டில் 197ஆம் இடத்திலும் ஐஐடி டெல்லி இருந்த நிலையில், முன்னேற்றம் கண்டுள்ளது.</p>
<p>அதே நேரத்தில் ஐஐடி மும்பை, கடந்த ஆண்டைக் காட்டிலும் சரிந்து 2ஆம் இடத்தைத் தக்க வைத்துள்ளது. குறிப்பாக 2025ஆம் ஆண்டு 118ஆம் இடத்தில் இருந்த ஐஐடி மும்பை, 2026ஆம் ஆண்டில் 129-ஆம் இடத்தில் உள்ளது.</p>
<h2><strong>அதிசயிக்க வைத்த ஐஐடி சென்னை</strong></h2>
<p>ஐஐடி சென்னை அதிசயத்தக்க அளவில் முன்னேற்றம் கண்டுள்ளது. 2025ஆம் ஆண்டு 227ஆம் இடத்தில் இருந்த ஐஐடி சென்னை, 47 இடங்கள் முன்னேறி 2026ஆம் ஆண்டில் 180-ஆம் இடத்தைப் பிடித்துள்ளது.</p>
<p>இந்த தரவரிசைப் பட்டியலில் இந்த ஆண்டு, இந்தியாவில் 54 பல்கலைக்கழகங்கள் இடம்பெற்றுள்ளன, இதன்மூலம் இந்தியா அமெரிக்கா, இங்கிலாந்து மற்றும் சீனாவுக்கு அடுத்தபடியாக உலக அளவில் நான்காவது அதிக பிரதிநிதித்துவப்படுத்தப்பட்ட நாடாக உள்ளது. இந்த ஆண்டு முதல் முறையாக 8 இந்திய நிறுவனங்கள் பட்டியலில் இடம்பிடித்து உள்ளன. இது உலக அரங்கில் இந்தியாவின் வளர்ந்து வரும் கல்வி நிலையை பிரதிபலிக்கிறது.</p>
<h2><strong>வேறு எந்தெந்த கல்வி நிறுவனங்கள்?</strong></h2>
<p>மற்ற முதன்மையான இந்திய நிறுவனங்களில் ஐஐடி கரக்பூர் (215), ஐஐஎஸ்சி பெங்களூரு (219) மற்றும் டெல்லி பல்கலைக்கழகம் (328) ஆகியவை அடங்கும். பிட்ஸ் பிலானி (668) மற்றும் ஓபி ஜிண்டால் குளோபல் பல்கலைக்கழகம் (851-900) போன்ற தனியார் நிறுவனங்களும் பட்டியலில் இடம்பெற்று உள்ளன.</p>
<p>முழு விவரங்களை <a href="https://www.topuniversities.com/world-university-rankings">https://www.topuniversities.com/world-university-rankings</a> என்ற இணைப்பில் காணலாம்.</p>
6 months ago
5 
